मुंबई- बॉलिवूडचे ज्येष्ठ अभिनेते अनुपम खेर यांनी बुधवारी फिल्म अॅण्ड टेलीव्हिजन इन्सिट्यूट ऑफ इंडियाच्या (एफटीआयआय) अध्यक्षपदाचा राजीनामा दिला. व्यस्त असल्यामुळे अध्यक्षपदाचा राजीनामा दिल्याचे खेर यांनी सांगितले आहे.
अनुपम खेर यांनी आपला राजीनामा माहिती व प्रसारण मंत्री राज्यवर्धन सिंग राठोड यांच्याकडे पाठविला आहे. प्रतिष्ठित संस्थेच्या अध्यक्षपदावर संधी मिळणे, हा माझ्यासाठी मोठा सन्मान होता, असे खेर यांनी म्हटले आहे.
माहिती व प्रसारण मंत्रालयाने 11ऑक्टोबर 2017 रोजी अनुपम खेर यांची ‘एफटीआयआय’च्या अध्यक्षपदी नियुक्ती केली होती. मात्र, या नियुक्तीनंतर विद्यार्थ्यांमध्ये नाराजी पसरली होती. सत्ताधारी भाजपच्या जवळील व्यक्तीची एफटीआयआयच्या अध्यक्षपदी नियुक्ती करण्यात आल्याची टीकाही झाली होती. त्यामुळे वर्षभरातच अनुपम खेर यांनी संस्थेच्या अध्यक्षपदाचा राजीनामा दिला आहे.