लंडन :अंडरवर्ल्ड डॉन दाऊद इब्राहिमचा जवळचा हस्तक जबीर मोतीला लंडनमध्ये ताब्यात घेण्यात आले आहे. इंग्लंडच्या सुरक्षा एजन्सीने ही कारवाई केली आहे. भारतासाठी हे मोठं यश मानलं जात आहे. मीडिया रिपोर्ट्सनुसार, भारताने जबीर मोतीच्या अटकेची मागणी केली होती
जबीर मोती पाकिस्तानी नागरिक आहे आणि तो डी-कंपनीच्या आर्थिक व्यवहारांचा प्रमुख मानला जातो. दाऊदच्या सगळ्या आर्थिक हिशेबांची माहिती असणाऱ्या मोतीला लंडनच्या हिल्टन हॉटेलमधून त्याला ताब्यात घेण्यात आले.
पाकिस्तानी नागरिक असलेला जबीर १० वर्षांच्या व्हिसावर इंग्लंडमध्ये राहत होता. जबीर मोती आणि दाऊदची पत्नी महजबीन, मुलगी महरीन आणि जावई जुनैद यांच्यातल्या आर्थिक देवाणघेवाणीच्या चौकशीनंतर जबीरवर ही कारवाई करण्यात आली. जबीर पाकिस्तान, मध्य पूर्व देश, इंग्लंड आणि युरोप, आफ्रिका आणि दक्षिण पूर्व आशियातल्या देशांमधली दाऊदची कामं सांभाळत होता. सूत्रांच्या माहितीनुसार, या देशांमधील व्यवसायांमधून होणारी कमाई आणि अवैध शस्त्रांची विक्री, अंमली पदार्थांचा व्यवसाय, रियल इस्टेट उद्योग, खंडणी आदी अन्य बेकायदा कामांमधून मिळणारे पैसै भारतविरोधी कारवायांसाठी वापरले जातात.