नवी दिल्ली – काळ्याधनाच्यामुद्यावरून काँग्रेस आणि भाजप समोरासमोर आले आहेत. केंद्रीय अर्थमंत्री अरुण जेटली यांनी परदेशात काळेधन साठवून ठेवलेल्यांची नावे उघड केली तर, काँग्रेसची नाचक्की होईल, असे वक्तव्य केले होते. त्याचा काँग्रेसने जोरदार विरोध केला आहे. सरकारने परदेशात काळेधन साठवून ठेवणार्यांचे एक-एक नाव जाहीर करावे, काँग्रेसला ब्लॅकमेल करु नये, असे काँग्रेस नेत्याने ठणकावले आहे. काळ्याधनाच्या मुद्यावर भाजप सरकार देशातील नागरिकांची दिशाभूल करत असल्याचा आरोपही त्यांनी केला आहे.
केंद्र सरकार पुढील आठवड्यात सुप्रीम कोर्टात परदेशातील बँकांमध्ये काळेधन जमा करुन ठेवलेल्यांची नावे उघड करणार आहे. केंद्राकडून२७ ऑक्टोबर रोजी पुरवणी शपथपत्र सादर केले जाईल, यात एकूण ८०० पैकी १३६ खातेधारकांची नावे बंद पाकिटात देण्यात येतील. हा निर्णय पंतप्रधान नरेंद्र मोदी, केंद्रीय अर्थमंत्री अरुण जेटली आणि भाजपाध्यक्ष अमित शहा यांनी मिळून घेतला असल्याचे कळते. ही यादी बंद पाकिटात सुप्रीम कोर्टात सादर केली जाईल. त्यानंतर ही नावे केव्हा उजेडात आणायची आणि त्यांच्याकडून किती टॅक्स वसूल करायचा हे कोर्ट ठरविणार आहे.