पिंपरी : निवडणूक प्रक्रियेद्वारे देशाला प्रगतीच्या वाटेवर पुढे नेता यावे यासाठी जनतेने निवडलेले प्रतिनिधी सक्षम असणे गरजेचे आहे आणि त्यासाठी मतदारांनी निर्भयपणे तसेच विचारपूर्वक मतदान करणे तेवढेच आवश्यक आहे. यादृष्टीने मतदारांमध्ये जागृती निर्माण करण्यासाठी निवडणूक आयोगातर्फे स्विप कार्यक्रम (सिस्टेमॅटिक व्होटर एज्युकेशन अँड इलेक्ट्रोल पार्टीसिपेशन प्रोग्राम) राबविला जातो. याच स्विप अंतर्गत ईव्हीएम – व्हीव्हीपॅट यंत्राचे प्रात्यक्षिक दाखविण्या कार्यक्रम यशस्वी एज्युकेशन सोसायटीच्या इंटरनॅशनल इन्स्टिट्यूट मॅनेजमेंट सायन्स (आयआयएमएस) व पुणे जिल्हा निवडणूक अधिकारी कार्यालय यांच्या संयुक्त विद्यमाने संस्थेच्या चिंचवड येथील कॅम्पसमध्ये आयोजित करण्यात आला होता.
याप्रसंगी बोलताना पिंपरी चिंचवड नवनगर विकास प्राधिकरणाच्या उप मुख्य कार्यकारी अधिकारी व स्विप व्यवस्थापन समितीच्या नोडल अधिकारी आशाराणी पाटील यांनी सांगितले की, निवडणुका हा लोकशाही प्रक्रियेचा कणा आहे. निवडणुकांमध्ये स्थानिक स्तरावरील समस्यांची सोडवणूक करण्यासाठी मतपेटीच्या माध्यमातून योग्य प्रतिनिधी निवडणे आवश्यक आहे. या निवडीवरच विकासाचे नियोजन आणि सामाजिक विकास अवलंबून असतो . मात्र यासाठी प्रत्येकाने आपला मतदानाचा हक्क बजावण्याचा ठाम निश्चय करायला हवा, कोणत्याही प्रलोभनाला किंवा दबावाला बळी न पडता आपल्या मताधिकाराचा उपयोग करायला हवा.तर याप्रसंगी बोलताना पिंपरी चिंचवड महानगर पालिकेचे उपायुक्त व मतदान नोंदणी अधिकारी डॉ.प्रवीण आष्टीकर यांनी सांगितले की, प्रत्येकाने स्वतः मतदानाचा हक्क बजावतानाच मित्र नातेवाईंकांनाही मतदानाचा हक्क बजावण्याबाबत प्रोत्साहित करायला हवे.
यावेळी सर्वांना यंदाच्या लोकसभा निवडणुकीत वापरण्यात येणाऱ्या व्हीव्हीपॅट (व्होटर व्हेरिफेबल पेपर ऑडिट ट्रेल) यंत्राचे प्रात्यक्षिक दाखविण्यात आले. ईव्हीएम यंत्रावर असलेल्या उमेदवारांच्या नावासमोरील बटन दाबल्यानंतर उमेदवाराचे नाव, क्रमांक, चिन्ह उल्लेख असलेली व्हीव्हीपॅट स्लीप ७ सेंकद मतदाराला दिसणार आहे, त्यानंतर आपोआप हि स्लीप कट होऊन बीप वाजल्यानंतर स्लीप सीलबंद पेटीत जमा आहे, यामुळे मतदारांना आपण दिलेल्या मताची खातरजमा करता येणे शक्य झाले आहे. यावेळी अतिरिक्त निवडणूक तहसीलदार राधिका हावळ यांनीही विद्यार्थ्यांनी विचारलेल्या प्रश्नांना उत्तरे देत माहिती सांगितली.
कार्यक्रमाचे प्रास्ताविक इंटरनॅशनल इन्स्टिट्यूट मॅनेजमेंट सायन्स संस्थेचे संचालक डॉ. मिलिंद मराठे यांनी केले तर आभारप्रदर्शन संस्थेचे अधिष्ठाता डॉ. राजेंद्र सबनीस यांनी केले. या कार्यक्रमाला निवडणूक नायब तहसीलदार उषा ठोंबरे, नायब तहसीलदार विमल डोलारे, आय. टी. असिस्टंट ढेकळे यांच्यासह निवडणूक कार्यालयाचे विविध पदाधिकारी तसेच ‘यशस्वी’ संस्थेचे संचालक संजय छत्रे, सर्व विद्यार्थी, अध्यापक वर्ग व अन्य कर्मचारी उपस्थित होते. या कार्यक्रमासाठी आदिती चिपळूणकर व शर्मा यांनी विशेष सहकार्य केले.
कार्यक्रमाचे सूत्रसंचालन योगेश रांगणेकर यांनी केले.