पुणे : युवकांनी केवळ नोकरीच्या मागे न लागता स्वतःचा व्यवसाय सुरु करावा, युवा वर्गात उद्योजकता वाढीस लागावी म्हणून यशस्वी एकेडमी फॉर स्किल्स व भारतीय युवा शक्ती ट्रस्ट (बीवायएसटी )संस्थानी सहकार्य करार केला आहे.
या करारानुसार ‘यशस्वी’ संस्थेच्या विद्यार्थ्यांना त्यांचे संस्थेतील शिक्षण पूर्ण केल्यानंतर स्वतःचा स्वयंरोजगार किंवा व्यवसाय सुरु करावयाचा असल्यास आता त्यांना भारतीय युवा शक्ती ट्रस्टतर्फे व्यवसायाची निवड कशी करावी, व्यवसाय सुरु कसा करावा, व्यवसायासाठी बॅंकेडून कर्ज उपलब्ध करून घेण्यासाठी तसेच असलेला व्यवसाय आणखी वाढवण्यासाठी सर्वतोपरी मदत केली जाणार आहे.
व्यवसाय सुरु करण्याची इच्छा असलेल्या विद्यार्थ्यांना एखादया व्यवसायासाठी लागणारे विविध परवाने, व्यवसायाची जागा, ग्राहक व बाजारपेठेची निवड, व्यवसायातील जोखीम, अडचणी आदी सर्व बाबींचे सविस्तर मार्गदर्शन करण्यासाठी बीवायएसटीचे तज्ञ् सल्लागार मदत करणार आहेत.
‘यशस्वी’ संस्थेच्या विविध स्किल डेव्हलपमेंट सेंटर मधून कौशल्य विकास अभ्यासक्रमांचे प्रशिक्षण घेणाऱ्या विदयार्थी -विद्यार्थीनींना यामुळे आपले उद्योजक होण्याचे स्वप्न पूर्ण करण्याची इच्छा सहजसाध्य होणार आहे.
देशात एकीकडे कौशल्य विकास प्रशिक्षणाच्या विविध योजना व स्किल इंडिया मिशनमुळे युवकांना कौशल्य प्रशिक्षण तर उपलब्ध होत आहे शिवाय मुद्रा लोन सारख्या योजनांमुळे त्यांना अर्थसहाय्यदेखील उपलब्ध होत आहे, मात्र उद्योजक होण्यासाठी जी मेंटॉर अर्थात मार्गदर्शकाची मुख्य गरज असते ती गरज बीवायएसटीसारख्या संस्था पूर्ण करू शकतात, आणि त्यामुळे उद्योजकतेची खरी सुरुवात होण्यास मदत होईल असे मत यावेळी ‘यशस्वी’ चे संचालक अभिषेक कुलकर्णी यांनी यावेळी व्यक्त केले.
या सहकार्य करार प्रसंगी ‘यशस्वी’ संस्थेच्यावतीने संचालक अभिषेक कुलकर्णी यांनी तर बीवायएसटीच्यावतीने राष्ट्रीय समन्वयक राधाकृष्णन निपाणी यांनी स्वाक्षरी केली. याप्रसंगी ‘यशस्वी’ चे संचालक अजय रांजणे, संजय सिंग व बीवायएसटीचे पुणे विभागाचे क्लस्टर हेड रोशन अहिरे, क्षेत्रीय अधिकारी विशाल चव्हाण आदी उपस्थित होते.