पुणे, दि. 28 जून : राज्यसभा खासदार व भाजपचे सहयोगी सदस्य संजय काकडे यांनी लोकसभा निवडणुकीसाठीची तयारी जोरात सुरु केली आहे. दलित, मुस्लिम नेते व पदाधिकाऱ्यांपाठोपाठ त्यांनी आता बहुजन समाजातील नेत्यांच्या भेटीगाठीवर भर देऊन पुण्यात सोशल इंजिनिअरिंगचा प्रयत्न सुरु केला असून याचाच भाग म्हणून त्यांनी आज शिवसेनेचे ज्येष्ठ नेते व माजी मंत्री शशिकांत सुतार यांची त्यांच्या घरी सदिच्छा भेट घेतली.
पुणे लोकसभा मतदार संघात निवडून येण्यासाठी आवश्यक त्या सोशल इंजिनिअरिंगचा प्रयत्न खासदार संजय काकडे यांनी चालविला आहे. रिपाइंचे अध्यक्ष व केंद्रीय मंत्री रामदास आठवले, काँग्रेसचे माजी खासदार सुरेश कलमाडी, डॉ. पी. ए. इनामदार, अॅड. एस. के. जैन आदी विविध मान्यवरांबरोबरच्या भेटीगाठी व डिनर डिप्लोमसीनंतर रमजान ईदनिमित्त खासदार काकडे यांची ईदगाह मैदानावरील उपस्थिती लक्षणीय ठरली. आता शिवसनेचे ज्येष्ठ नेते शशिकांत सुतार यांची सदिच्छा भेट घेतली. यातून पुणे लोकसभा मतदार संघासाठी आपली दावेदारी प्रबळ करण्याचा प्रयत्न संजय काकडे यांनी पद्धतशीरपणे चालविला असल्याचे राजकीय जाणकारांचे मत आहे.
खासदार संजय काकडे हे सध्या राज्यसभेचे खासदार आहेत. जनतेतून निवडून जाण्याची त्यांची इच्छा त्यांनी बोलून दाखविली आहे. पुण्यासाठी व पर्यायाने महाराष्ट्र व देशासाठी चांगले काम करण्याचा मनोदय त्यांनी अनेकवेळा बोलून दाखविला आहे. महापालिकेत भाजपची सत्ता आल्यानंतर समान पाणीपुरवठ्याच्या निविदेच्या विषयावर सत्ताधारी भाजपला विरोधकांनी चांगलेच खिंडीत गाठले होते. यावेळी खासदार काकडे यांनी समान पाणीपुरवठा योजनेच्या निविदेतील त्रुटी सउदाहरण पुणेकरांसमोर आणल्या. मुख्यमंत्री देवेंद्र फडणवीस यांच्या नजरेस त्या व्यवस्थितपणे आणल्या. त्यानंतर मुख्यमंत्र्यांनीही फेरनिविदा काढण्याच्या सूचना महापालिकेला दिल्या. यातून पुणेकरांचे कोट्यावधी रुपये वाचले आणि सर्वस्तरातून खासदार काकडे यांचे कौतुक झाले.
खासदार काकडे यांचे दलित, मुस्लिमसह बहुजन समाजात मोठ्या प्रमाणात चाहते व हितचिंतक आहेत. त्यांचे सोशल नेटवर्कींग मजबूत आहे. याची चुणूक गेल्या महापालिका निवडणुकीत सर्वांना पाहायला मिळाली. त्यांच्याकडे कार्यकर्त्यांचे मोठे नेटवर्क आहे. यातूनच ते आता सोशल इंजिनिअरिंगचा प्रयत्न करून लोकसभेची दावेदारी पक्की करण्याचा प्रयत्न करीत आहेत.
पुणे लोकसभेची उमेदवारी संजय काकडे यांना मिळणार का? त्यांचे हे सोशल इंजिनिअरिंगचे प्रयत्न फलद्रूप होणार का? या प्रश्नांच्या उत्तरासाठी आपल्याला अजून वाट पाहावी लागणार असली तरी, काकडेंनी सुरु केलेल्या भेटीगाठींची चर्चा पुण्यातील राजकीय क्षेत्रात चांगलीच सुरु असल्याचे चित्र आहे.