शिवणे ते म्हात्रे पूल रस्ता अडकला लालफितेशाहीत
पुणे- शिवणे ते म्हात्रे पूल रस्त्याचे भूसंपादन आणि रुंदीकरण विविध खात्यांच्या टोलवाटोलवीत अडकून पडल्याचा आरोप भाजपचे उपाध्यक्ष संदीप खर्डेकर यांनी केला आहे
या संदर्भात त्यांनी महापालिका आयुक्तांना पत्र दिले असून … पहा नेमके त्यात काय म्हटले आहे ,
मा सौरभ राव,
आयुक्त पुणे मनपा,
विषय – शिवणे खराडी रस्त्याचा शिवणे ते म्हात्रे पूल रस्ता अडकला लालफितेशाहीत / विविध खात्यांची टोलवाटोलवी/भूसंपादन रुंदीकरण लटकले/ नागरिकांच्या विरोधामुळे १० ऑगस्ट ला मोजणी ही थांबली….
मा महोदय,
काल आपण शिवणे खराडी रस्त्याबाबत आमदार जगदीश मुळीक यांच्यासह बैठक घेऊन विविध आश्वासने दिल्याचे समजले.याबद्दल आपले अभिनंदन.मात्र यामध्ये आपला भर खराडी भागातील भूसंपादनावर होता.मात्र शिवणे ते म्हात्रे पूल या रस्त्यासाठी मी तीन वर्ष पाठपुरावा करत असून एरंडवणे भागातील नगरसेविका मंजुश्री खर्डेकर आपणास साईट व्हिजिट साठी पाठपुरावा करत आहेतच.
मी एस एम एस द्वारे आपणास येथील गंभीर परिस्थिती ची कल्पना दिल्यावर आपण पथ विभागाचे श्री.अनिरुद्ध पावसकर यांना सूचना दिल्यानंतर ४ ऑगस्ट रोजी मनपा मध्ये अतिरिक्त आयुक्त मा. राजेंद्र निंबाळकर यांनी सर्व जागा मालकांची बैठक घेतली.सदर बैठकीत निंबाळकर साहेबांनी डी पी नुसार रस्ता ३६ मीटर चा करण्यात येईल असे सांगून याबाबतचा संभ्रम दूर केला.तदनंतर त्यांनी जमीनमालकांना जागा ताबा देण्याबाबतचे आवाहन केले व प्रपोजल सादर केल्यावर जमिनीच्या मोबदल्यात सहा महिन्यात टी डी आर च्या स्वरूपात मोबदला देण्याचे वचन दिले.तसेच दिनांक १० ऑगस्ट रोजी सकाळपासून मोजणी करण्यास व ३६ मीटरचे मार्किंग करण्याबाबतच्या सूचना ही दिल्या.मात्र मोजणीच्या वेळी अनेक जमीन मालकांनी सिटी सर्वे व मनपा च्या संयुक्त मोजणीची मागणी केली व मोजणी प्रक्रिया थांबविली.पुन्हा पहिले पाढे पंचावन्न…..
साहेब हा रस्ता झाला तर कर्वे रस्ता व सिंहगड रस्त्यावरील ताण हलका होईल व नागरिकांची वाहतूक कोंडीतून सुटका होईल हे समजून घेऊन त्वरित खालील कार्यवाही केली जावी …
१) आपली ह्या रस्त्यास व्हिजिट व सर्व संबंधित खात्यांची एकत्रित बैठक.
२) मातोश्री वृद्धाश्रमासमोर एक भंगार चा व्यावसायिक मनपा च्या नोटिशींविरुद्ध न्यायालयात जातो आणि स्टे मिळवतो/पाच वर्ष हा स्ट अबाधित आहे/धन्य ते आपले विधी विभाग.आज तर येथे नवीन हिरवी शेड टाकण्यात आली आहे व तेथे नर्सरी सुरु होत आहे,उद्या हे सदगृहस्थ ही स्टे मिळवतील आणि रस्ता रुंदीकरण थांबेल हे सांगणे न लगे…. याच्याच शेजारी स्मार्ट सिटी चा फलक दिमाखात उभा आहे.
३) मॅजेंटा लान्स,पंडित फार्म,श्री सावरकर यांचे जमीन ताबा देण्याबाबतची संमतीपत्र असूनही अद्याप कार्यवाही होत नाही ही शोकांतिका आहे.
४) पी के बिर्याणी यावर गेल्या आठवड्यात कारवाई झाली मात्र मी वारंवार विनंती करून ही तेथे त्वरित रस्त्याचे काम सुरु न केल्याने पुन्हा शेड उभे राहिले.
५) नवसह्याद्री विरुद्ध पुणे मनपा हा दावा ही दीर्घ काल उच्चं न्यायालयात प्रलंबित आहे,एकूणच विधी खात्याच्या कारभाराबद्दल शंका यावी अशीच परिस्थिती आहे.
६) सर्वे न ४३/१५ व सर्वे न ४७/२/३ नवसह्याद्री पोस्ट ऑफिस समोर च्या डी पी रस्त्यामध्ये बाधित लाभार्थींचे व म्हात्रे पुलाखालील बाधित १४ खासगी मिळकतधारक लाभार्थींचे बी एस यु पी अंतर्गत स्थलांतर झाले आहे,मात्र अद्याप येथे ताबा घेण्याबाबत मनपा च्या विविध खात्यांची टोलवाटोलवी सुरु आहे.
७) सिद्धी गार्डन येथून हा रस्ता म्हात्रे पुलाखालून नदी पात्रातील रस्त्याला जोडणे अपेक्षित आहे मात्र याबाबत ही काहीच हालचाल होताना दिसत नाही.
तरी कृपया त्वरित याबाबत निर्णय घ्यावा व प्रत्यक्ष अडचणी दूर करून कार्यवाही करावी ही नम्र विनंती,
आपला,
संदीप खर्डेकर.
मो 9850999995.
उपाध्यक्ष ,भारतीय जनता पार्टी पुणे.