सायंकाळी ५:३० ते ९ वाजेपर्यंत नळ स्टॉप ते पौडफाटा एकेरी वाहतूक – पोलीस उपायुक्त तेजस्वी सातपुते
मेट्रो ने दुरुस्तीची कामे त्वरित करावीत – संदीप खर्डेकर.
पुणे-कर्वे रस्त्यावर नागरिकांना कमीत कमी त्रास व्हावा यासाठी विविध उपाययोजना करण्यात येत असून सध्या रात्री ११ पर्यंत असणाऱ्या वाहतूक कोंडीची वेळ जवळजवळ २ तासाने कमी करण्यात वाहतूक पोलिसांना यश आल्याचे वाहतूक पोलीस उपायुक्त तेजस्वी सातपुते म्हणाल्या.भाजप चे शहर उपाध्यक्ष संदीप खर्डेकर यांनी कर्वे रस्त्यावरील वाहतुकीची समस्या सोडविण्याच्या दृष्टिकोनातून पाहणी व उपाययोजने साठी या भेटीची आयोजन केले होते.यावेळी सजग नागरिक मंच चे विवेक वेलणकर,स्थानिक नगरसेविका मंजुश्री खर्डेकर,प्रभाग समिती अध्यक्ष दीपक पोटे,नगरसेवक जयंत भावे,नगरसेविका छायाताई मारणे,वृषालीताई चौधरी,माधुरीताई सहस्रबुद्धे,मेट्रो चे अतिरिक्त प्रोजेक्ट इन्चार्ज प्रशांत कुलकर्णी,श्री मुलमुळे,पुणे मनपा चे श्री नरेंद्र देवकर,श्री वाघमारे,श्री मुकुंद शिंदे,एन सी सी कंस्ट्रक्शन्सचे नामदेव गव्हाणे,पोलीस निरीक्षक प्रतिभा जोशी, शिवसेनेचे शिरीष फडतरे,मनसेचे राम बोरकर,संदीप मोकाटे व इतर स्थानिक नागरिक मोठ्या संख्येने उपस्थित होते.
सायंकाळी ५:३० ते ९ वाजेपर्यंत नळ स्टॉप चौक ते पौडफाटा एकेरी वाहतूक राबविण्यात येईल व कोथरूड कडून येणारी वाहतूक एस एन डी टी शेजारील कॅनाल वरून वळविण्यात येईल , या व्यवस्थेमुळे वाहतूक कोंडीतून मोठा दिलासा मिळत असल्याचे निरीक्षण पोलीस उपायुक्त तेजस्वी सातपुते यांनी नोंदविले तसेच कोंडी च्या वेळेस मी स्वतः,माझा स्टाफ व वार्डन्स याठिकाणी थांबून वाहतूक सुरळीत करण्याचा प्रयत्न करत आहोत असे ही त्या म्हणाल्या.मात्र मेट्रो कडून सुधारणांची कामे जलदगतीने होत नसल्याची खंत ही त्यांनी व्यक्त केली.
पाळंदे कुरियरची गल्ली किंवा निसर्ग कडून येणार रस्ता कोणत्याही परिस्थितीत बंद केला जाऊ नये असे नगरसेविका मंजुश्री खर्डेकर म्हणाल्या/त्यास मान्यता देण्यात अली व अपवादात्मक परिस्थितीत तेथे वाहतूक वळविण्याचा पर्याय योजला जातो असे निरीक्षक प्रतिभा जोशी यांनी स्पष्ट केले.
विवेक वेलणकर यांनी कर्वे रस्त्यावर बॅरिकेड्स लावून (डेडिकेटेड ) फक्त दुचाकींसाठी एक लेन करण्यात यावी अशी सूचना केली,तर नगरसेवक जयंत भावे यांनी नळ स्टॉप कडून वर जाताना मध्ये डिव्हायडर तोडून थेटपुलावर (पौडफाटा फ्लायओव्हर वर ) वाहनांना प्रवेश देण्याबाबत सूचना केली.अभिनव शाळेची गल्ली ही धोकादायक झाली असून गर्दी झाली कि दुचाकीस्वार वेगाने या गल्लीत घुसतात,येथे ३ शाळा असून लहान मुले रस्त्यावरून ये जा करत असतात,यावर उपाययोजना करण्याची मागणी शिरीष फडतरे यांनी केली,तर पोलीस खात्यासाठी बॅरिकेड्स उपलब्ध करून देऊ व कोंडी सोडविण्यासाठी सर्वतोपरी सहकार्य करू असे दीपक पोटे म्हणाले.
पौड रस्त्यावरील पदपथ व रस्त्यावर मोठे पाईप आणून टाकले असून १५ दिवस पाठपुरावा करून ही ते हलविले जात नसल्याबद्दल नगरसेविका छायाताई मारणे यांनी नाराजी व्यक्त केली.
मेट्रो च्या वतीने प्रशांत कुलकर्णी यांनी ” दुभाजकांवर त्वरित रेडियम लावण्यात येईल व दुभाजक रात्रीच्या वेळी सुद्धा दिसावेत यासाठी रंग मारण्याचे काम तसेच पाईप उचलणे व विविध ठिकाणी बोर्ड लावण्याचे काम दोन दिवसात पूर्ण करण्याचे आश्वासन दिले.या रस्त्यावरील जड वाहतुकीस अन्यत्र वळविता येईल किंवा कसे याबाबत ही विचार केला जावा अशी सूचना ही उपस्थितांनी केली.
कॅनाल रस्ता जेथे प्रभात रस्त्याला मिळतो तेथे वरदान नेमावेत तसेच कर्वे रस्त्यावर डिव्हायडर फोडून ये जा करणाऱ्यांवर कारवाई करावी तसेच या ठिकाणी भक्कम बॅरिकेड्स उभारावेत अशी सूचना संदीप खर्डेकर यांनी केली.सकाळ संध्याकाळ येथील गोठे मालक गायी म्हशी घेऊन भर गर्दीत ये जा करतात त्याचा त्रास होतो असे पोलीस निरीक्षक प्रतिभा जोशी म्हणाल्या,यावर गोठ्याच्या स्थलांतरासाठी प्रयत्नशील असल्याचे नगरसेविका मंजुश्री खर्डेकर,दीपक पोटे व जयंत भावे यांनी सांगितले.
अजून ८ महिने मेट्रो चे काम चालणार असून या दरम्यान वेळोवेळी आढावा घेऊन नागरिकांना वाहतूक कोंडीतून दिलासा मिळावा यासाठी प्रयत्नशील राहणार असल्याचे संदीप खर्डेकर यांनी सांगितले.