पुणे – शहरातील मनाच्या गणपतीच्या मिरवणूकीला सकाळी दहा वाजता सुरुवात झाली. महापौर मुक्ता टिळक आणि खासदार गिरीश बापट, शिवसेना नेत्या नीलम गोऱ्हे यांच्या हस्ते मनाच्या कसबा गणपतीची आरती करून या मिरवणुकीस सुरुवात करण्यात आली. उपमहापौर डॉ. सिद्धार्थ धेंडे, भाजप शहराध्यक्ष मधुरीताई मिसाळ, महापालिका आयुक्त सौरभ राव, पोलिस आयुक्त के. व्यंकटेशम, जिल्हाधिकारी नवल किशोर राम, माजी आमदार मोहन जोशी, शरद रणपिसे, नगरसेवक प्रसन्न जगताप, महेश लडकत, आदित्य माळावे, राजेश येनपुरे, नगरसेविका मंजुश्री खर्डेकर, गायत्री खडके , मनीषा लडकत, रिपाईचे मंदार जोशी यावेळी उपस्थित होत्या. दरम्यान, या मानाच्या पहिल्या गणपतीचे पोलिसांच्या ड्रोन कॅमेऱ्यात मनमोहक दृश्य कैद करण्यात आले आहेत.
मानाच्या गणपतींच्या मिरवणुकीला 10 वाजल्यापासून सुरुवात झाली. यावेळी गणरायासाठी चौका-चौकात रांगोळ्या काढण्यात आल्या. सर्व मार्गाने पायघड्या आणि ध्वजमय वातावरण झाले. याच दरम्यान राणी लक्ष्मीबाई मुलींची शाळा यांच्या वतीने मुलींकडून मल्लखांबचे प्रात्यक्षिक सुद्धा दाखवण्यात आले आहे. शहरातील गणेश विसर्जनसाठी खडकवासला धरणातून सकाळी 11 पासून विसर्ग वाढविण्यात आला आहे. रात्री 1700 क्यूसेक असलेला विसर्ग सकाळी 11 वाजता 3400 क्यूसेक करण्यात आला आहे.
मानाचा पहिला कसबा गणपती विसर्जनासाठी रवाना
मानाचा पहिला कसबा गणपती दुपारी 3 वाजून 10 मिनिटांनी टिळक चौकातून महापौर मुक्ता टिळक, पालकमंत्री चंद्रकांत पाटील यांच्या हस्ते श्रीफळ स्वीकारून विसर्जनासाठी रवाना झाला. फक्त 1.5 किलोमीटरच्या अंतरासाठी सुमारे 5 तास लागले.
4.20 PM – पुण्याचे ग्रामदैवत आणि मानाचा पहिला कसबा गणपतीचे मुठा नदीच्या नटेश्वर घाटावर कृत्रिम हौदात विसर्जन. सकाळी साडेदहा वाजता कसबा गणपतीच्या मिरवणुकीला सुरुवात झाली होती.
4.50 PM – मानाचा दुसरा तांबडी जोगेश्वरी गणपतीचेही नटेश्वर घाटावर कृत्रिम हौदात विसर्जन.
5:52 PM – मानाचा तिसरा गुरुजी तालीम गणपतीचे नटेश्वर घाटावर कृत्रिम हौदात विसर्जन.
5:55 PM – तुळशीबाग आणि केसरी वाडा गणपती मिरवणुकीचा अंतिम टप्पा असलेल्या अलका चौकातून पुढे विसर्जनासाठी रवाना.
6:07 PM – मानाचा चौथा तुळशीबाग गणपतीचे पांचाळेश्वर घाटावर विसर्जन.
सायंकाळी 6: 30 -मानाचा पाचवा केसरीवाडा गणपतीचेही पांचाळेश्वर घाटावर कृत्रिम हौदात विसर्जन
पुण्यातील मानाच्या पाचही गणपतींचे विसर्जन झाले आहे..सकाळी साडेदहा वाजता या गणपतींच्या मिरवणुकीला सुरवात झाली होती..त्यानंतर सायंकाळी 6: 30 मिनीटांनी या मानाच्या गणपतींची मिरवणूक संपली…