पुणे-
३१व्या पुणे फेस्टिव्हलमध्ये दि. ९ व १० सप्टेंबर रोजी रात्री ८ वाजता श्री गणेश कला क्रीडा रंगमंच येथे ‘फुल्टू टाईमपास’ आणि ‘फक्त पुणे’ या २ नव्या कार्यक्रमांची भर पडली आहे. नृत्य, विनोद, संगीत, मस्ती आणि धमाल यांचा एकत्रित मिश्रण असणारा ‘फुल्टू टाईमपास’ हा विशेष कार्यक्रम सोमवार ९ सप्टेंबर रोजी रात्री ८ वाजता श्री गणेश कला क्रीडा रंगमंच येथे संपन्न होईल. प्रसाद ओक आणि पुष्कर श्रोत्री या कार्यक्रमाचे सूत्रसंचालन करणार असून समीर चौघुले, शशिकांत केरकर, विनोद बोंडे, विशाखा सुबेधार आणि योगिनी पोफळे हे कलावंत यात सहभागी होतील. नृत्यांगना भार्गवी चिरमुले, पुष्कर जोग, मयुरेश पेम, तन्वी पालव आणि सुकन्या कालण हे नृत्याविष्कार सादर करतील.
मंगळवार दि. १० सप्टेंबर रोजी रात्री ८ वाजता श्री गणेश कला क्रीडा रंगमंच येथे ‘फक्त पुणे’ हा विशेष कार्यक्रम सादर होईल. महाराष्ट्राची सांस्कृतिक राजधानी असणाऱ्या पुण्याची वैशिष्ठे, इतिहास आणि पुणेकरांचे स्वभाव ह्यावर प्रकाशझोत टाकणाऱ्या या कार्यक्रमाचे सूत्रसंचालन आनंद इंगळे आणि संजय मोने करणार आहेत. श्रीकर पित्रे, दया गायकवाड, विग्नेश जोशी, योगिनी पोफळे आणि मुग्धा परांजपे हे कलावंत यात सहभागी होत असून शर्वरी जेमनीस, पुष्कर जोग, स्नेहा चव्हाण विश्वासराव आणि मीरा जोशी हे कलावंत नृत्याविष्कार सादर करतील. पुणे फेस्टिव्हलच्या मंचावर सादर होणारे हे २ अतिरिक्त कार्यक्रम रसिक प्रेक्षकांना विशेष आनंद देतील.