पुणे :दगडूशेठ दत्त मंदिराशेजारी बाबुगेनु चौक १११२/१३ बुधवार पेठ येथील ८ गुंठे ट्रस्टची जागा पुणे पालिकेने सुपर मार्केटच्या नावाखाली आरक्षित करून १५ व्यावसायिक भाडेकरूंना गेली ८ वर्षे वाऱ्यावर सोडले आहे. पालिकेने तातडीने पुनर्वसन करावे अन्यथा पालिकेसमोर आमरण उपोषण करू, असा इशारा श्रीराम व्यावसायिक भाडेकरू संघाने पत्रकार परिषदेत दिला.
श्रमिक पत्रकार संघ येथे झालेल्या पत्रकार परिषदेप्रसंगी श्रीराम व्यावसायिक भाडेकरू संघा’च्या वतीने देवेंद्र शर्मा, एस.पी. वर्मा, गजानन कोराळे, मेघा सूर्यवंशी, श्री. आगा, श्री. पटपटीया आणि श्रीराम व्यावसायिक भाडेकरू संघाचे सभासद उपस्थित होते.सदरची जागा ‘रामचंद्र महादेव ट्रस्ट’ ची होती. १९८७ साली पालिकेने आरक्षण केले आणि ट्रस्ट ला जागा आजतागायत विकसित करून दिलेली नाही. तेथील व्यावसायिक भाडेकरूंना बेघर केले. याबाबत संघाने माहिती अधिकार, आयुक्त, पालकमंत्री, स्थानिक नगरसेवक यांच्याकडे मदतीची धाव घेतली परंतु कोणीच याची दखल घेतली नाही. ७० ते ८o वर्षापासून तेथे व्यवसाय करणाऱ्या भाडेकरूंचे पुनर्वसन झालेले नाही, त्यांचे त्याच जागेत पुनर्वसन व्हावे, अशी मागणी देवेंद्र शर्मा यांनी यावेळी केली.सदर जागा सद्यस्थितीत कचरापेटी समान पडून आहे. पालिका तात्पुरता व्यवसाय करण्यास देखील त्या जागेवर परवानगी देत नाही.तरी आम्ही संघाच्या वतीने सदर जागेवर सुपर मार्केट बांधून व्यावसायिक भाडेकरूंना पुनर्वसन करून हक्क द्यावा, अशी मागणी करीत आहोत असे या पत्रकार परिषदेत सांगितले.
या प्रभागाचे नेतृत्व महापौर मुक्ता टिळक करतात, तर आमदार गिरीश बापट हे पालकमंत्री आहेत. पालिकेच्या ३५ लोकशाही दिनामध्ये उपस्थित राहूनही या भाडेकरूंना न्याय मिळाला नाही.