पुणे – सत्ताधारी भाजपने स्वारगेट ते कात्रज या मेट्रोमार्गात बांधकाम व्यावसायिकासाठी बदल केला आहे. स्वारगेट-मुकुंदनगर-गंगाधाम मार्गे कात्रजपर्यंत घेऊन जाण्याचा भाजपने घाट घातला असल्याचा आरोप राष्ट्रवादी काँग्रेसने केला आहे. याविरोधात पुणे शहर राष्ट्रवादी काँग्रेसच्या वतीने स्वारगेट येथील जेधे चौकात आंदोलन करण्यात आले.
केंद्र सरकारच्या माध्यमातून पिंपरी-चिंचवड ते शिवाजीनगर आणि शिवाजीनगरहून सातारा रस्त्याने कात्रज असा मेट्रोचा मार्ग प्रस्तावित आहे. मात्र, पुणे महापालिकेतील सत्ताधारी भाजपच्या वतीने हा मार्ग वळवल्याचा आरोप करत त्याच्या निषेधार्थ आज स्वारगेट चौकात राष्ट्रवादी काँग्रेस पक्षाचे शहर अध्यक्ष चेतन तुपे यांच्या नेतृत्वाखाली आंदोलन करण्यात आले.
यावेळी राष्ट्रवादी काँग्रेस पक्षाचे शहर अध्यक्ष चेतन तुपे म्हणाले, पुणे शहरातून जाणाऱ्या मेट्रोचा मार्ग स्वारगेट-सातारा रस्ता-कात्रज असा पद्धतीने जाणार आहे. मात्र, पुणे महापालिकेतील सत्ताधारी भाजपने या मार्गात बदल करुन स्वारगेट-मुकुंदनगर-गंगाधाम मार्गे नेण्याचा घाट घातला आहे. हा मार्ग बांधकाम व्यावसायिकासाठी वळविण्यात आल्याचा आरोप तुपे यांनी केला. ही निषेधार्थ बाब असून हा मार्ग बदलल्यास भविष्यात आणखी तीव्र आंदोलन करण्याचा इशारा यावेळी देण्यात आला.