थकबाकी असल्यास वीजपुरवठा खंडितच होणार – प्रादेशिक संचालक श्री. संजय ताकसांडे
पुणे: पुणे, पिंपरी चिंचवड शहरांसह मुळशी, जुन्नर, आंबेगाव, मावळ, खेड तालुक्यातील 6 लाख 78 हजार घरगुती, वाणिज्यिक व औद्योगिक थकबाकीदारांकडे असलेली 132 कोटी 48 लाख रुपयांची थकबाकी शून्य करण्यासाठी पुन्हा एकदा ‘शून्य थकबाकी’ मोहिम मंगळवारी (दि. 6) आक्रमक करण्यात आली.
या मोहिमेत सहभागी झालेल्या पुणे परिमंडलातील सुमारे 1400 अभियंते, अधिकारी व जनमित्रांशी सेनापती बापट मार्गावरील ‘प्रकाशभवन’ येथे प्रादेशिक संचालक श्री. संजय ताकसांडे यांनी थेट संवाद साधला. यावेळी मुख्य अभियंता श्री. एम. जी. शिंदे, अधीक्षक अभियंता श्री. महेंद्ग दिवाकर, श्री. सुंदर लटपटे, श्री. राजेंद्ग पवार यांची प्रमुख उपस्थिती होती.
यावेळी प्रादेशिक संचालक श्री. संजय ताकसांडे म्हणाले, की सद्यस्थितीत वीजबिलाच्या थकबाकीमुळे महावितरणसमोर आर्थिक संकट उभे राहिले आहे. शून्य थकबाकी मोहिमेत गेल्या नोव्हेंबर व डिसेंबरमध्ये तसे चांगले काम झाले. परंतु या महिन्यात संपूर्ण थकबाकी शून्य करण्याच्या ध्येयानेच काम करणे आवश्यक आहे व थकबाकी असल्यास वीजपुरवठा खंडितच होणार असा संदेश या मोहिमेद्वारे थकबाकीदारांना द्यावा. ही मोहीम पूर्ण आक्रमकपणे राबविल्या गेली पाहिजे व थकबाकी पूर्णपणे याच महिन्यात वसूल झाली पाहिजे, असे निर्देशही प्रादेशिक संचालक श्री. संजय ताकसांडे यांनी यावेळी दिले. यासोबतच सर्व अधिकारी व जनमित्रांनी वीजबिलांचे अचूक रिडींग घेऊन वीजग्राहकांना वीजवापराचे योग्य बिल मिळेल यासाठी उपाययोजना कराव्यात. यात हयगय करणार्या रिडींग एजन्सीजविरुद्ध फौजदारी कारवाई करण्याचे सुद्धा निर्देश त्यांनी यावेळी दिले. यावेळी मुख्य अभियंता श्री. एम. जी. शिंदे यांनी मनोगतामध्ये पुणे परिमंडलाला वीजबिलांच्या थकबाकीतून मुक्त करण्याचे आवाहन केले.
शून्य थकबाकी मोहिमेवर निघालेल्या अभियंता, जनमित्रांनी प्रादेशिक संचालक श्री. ताकसांडे यांच्या आवाहनाला मोठा प्रतिसाद देत थकबाकी वसुलीचा निर्धार केला. थकबाकीदारांची नावे असलेल्या अद्ययावत ‘डीडीएल’ (डेली डिस्कनेक्शन लिस्ट) याद्या घेऊन सुमारे 25 ते 50 जणांच्या एका पथकाद्वारे जनमित्रांनी लगेचच वीजपुरवठा खंडित करण्याची मोहीम सुरु केली. तसेच ज्या ग्राहकांची थकबाकी एक हजार रुपयांपेक्षा अधिक आहे, त्यांच्या नावांची यादी महावितरणच्या विविध कार्यालयांत दर्शनी भागात लावण्याचे यावेळी ठरविण्यात आले. जेणेकरून वीजग्राहकांना थकीत वीजबिलाची माहिती उपलब्ध होईल.
पुणे परिमंडलातील पुणे, पिंपरी चिंचवड शहरांसह मुळशी, जुन्नर, आंबेगाव, मावळ, खेड तालुक्यात सद्यस्थितीत 6 लाख 78 हजार घरगुती, वाणिज्यिक व औद्योगिक ग्राहकांकडे 132 कोटी 48 लाख रुपयांची थकबाकी आहे. वीजग्राहकांकडे किती रक्कम थकीत आहे हे न पाहता वीजपुरवठा खंडित करण्यात येणार आहे. आजपासून आक्रमपणे सुरु झालेल्या ‘शून्य थकबाकी मोहिमे’त अधीक्षक अभियंता, कार्यकारी अभियंता, सर्व उपविभाग व शाखा कार्यालयांचे प्रमुख अभियंते, लेखा अधिकारी तसेच हजारो जनमित्र सहभागी झाले होते.
वीजपुरवठा खंडित झाल्यानंतर थकीत वीजबिलांचा भरणा करणे, संबंधित कार्यालयात पावती दाखवून, रिकनेक्शन चार्जेस भरून वीजपुरवठा सुरु करून घ्यावा लागणार आहे. याशिवाय तात्पुरता किंवा कायमस्वरुपी वीजपुरवठा खंडित केल्यानंतरही थकबाकीदार अनधिकृतपणे विजेचा वापर करीत असेल तर त्यांच्याविरुद्ध तात्काळ फौजदारी कारवाई करण्याच्या सूचना देण्यात आल्या.
थकीत वीजबिलांचा संबंधित ग्राहकांनी तात्काळ भरणा करावा अन्यथा वीजपुरवठा खंडितच केला जाणार आहे. ही कटू कारवाई टाळण्यासाठी थकीत वीजबिलांचा त्वरीत भरणा करून सहकार्य करावे, असे आवाहन महावितरणने केले आहे. थकीत वीजबिल भरण्यासाठी स्थानिक वीजबील भरणा केंद्गे तसेच घरबसल्या ‘ऑनलाईन’ पेमेंटसाठी महावितरणची www.mahadiscom.in ही वेबसाईट तसेच मोबाईल अॅपचा पर्याय उपलब्ध आहे.