पुणे विद्यार्थी गृहामध्ये आंतरराष्ट्रीय योगदिन साजरा
पुणे : आंतरराष्ट्रीय योग दिवसाचे औचित्य साधून पुणे विद्यार्थी गृहाच्या महाराष्ट्र विद्यालय, मुक्तांगण इंग्लिश स्कूल, सदाशिव पेठ शाखा, अभियांत्रिकी व तंत्रज्ञान महाविद्यालय, पुणे एनसीसीच्या विद्यार्थ्यांसाठी, तसेच संबंधित महाविद्यालयातील शिक्षक व शिक्षकेतर कर्मचारी यांच्यासाठी आणि पुणे विद्यार्थी गृह संस्थेच्या आश्रम वसतिगृहातील विद्यार्थ्यांसाठी सुखकर्ता सांस्कृतिक प्रतिष्ठान, ब्रह्ममूर्त ज्ञानपीठ केंद्र व ज्येष्ठ नागरिक हास्य क्लबच्या संयुक्त विद्यमाने योगवर्गाचे आयोजन केले होते.
पुणे विद्यार्थी गृहाच्या सदाशिव पेठेतील परिसरात हा योगवर्ग भरला. या कार्यक्रमाला सुखकर्ता सांस्कृतिक प्रतिष्ठानचे अध्यक्ष डॉ. राजकुमार शहा आणि पुणे विद्यार्थी गृह संस्थेचे कुलसचिव सुनील रेडेकर यांनी उपस्थितांचे स्वागत केले. कार्यक्रमासाठी प्रमुख पाहुण्या म्हणून एमआयटी विश्वशांती केंद्राच्या उर्मिला विश्वनाथ कराड उपस्थित होत्या. ब्रह्ममूर्त ज्ञानपीठ केंद्रातर्फे प्रतिभा मोरे, योगगुरु दीपक शिळीमकर आणि त्यांच्या सहकार्यांनी मार्गदर्शन केले व त्यांनी तयार केलेला पॉवर सूर्यनमस्कार याचीही प्रात्याक्षिके घेतली. हास्य क्लबच्या सदस्यांनी सहा ते सात हास्य प्रकार उपस्थितांना शिकविले.
महेंद्र घागरे यांनी चंदनाच्या झाडाच्या बियांचे वाटप केले. संस्थेचे ज्येष्ठ संचालक हणमंत भोसले, संचालक प्रा. राजेंद्र कडुसकर, हास्य क्लबचे मिलींद तांबोळी, चंद्रशेखर कोरडे आणि अशोक कदम हे उपस्थित होते. स्वाती दिवाण यांनी कार्यक्रमाचे सूत्रसंचलन केले आणि सुप्रिया जोशी यांनी आभार व्यक्त केले.