पुणे : नोकर भरतीत १३ पॉईंट रोस्टर पद्धत लागू करण्याविरोधात रिपब्लिकन पार्टी ऑफ इंडियातर्फे (ए) जिल्हाधिकारी कार्यालयावर तीव्र निदर्शने करण्यात आली. तसेच भीमा कोरेगाव प्रकरणी महाराष्ट्र बंद आंदोलनावेळी आंबेडकरी चळवळीतील कार्यकर्त्यांवर दाखल झालेले गुन्हे मागे घ्यावेत, अशी मागणीही यावेळी करण्यात आली. ससून रुग्णालयासमोरील डॉ. बाबासाहेब आंबेडकर यांच्या पुतळ्याला हार करून घालून आंदोलनाला सुरुवात झाली. आंबेडकर पुतळ्यापासून जिल्हाधिकारी कार्यालयापर्यंत शेकडो कार्यकर्त्यांनी घोषणा देत आंदोलन केले.
या आंदोलनात पुण्याचे उपमहापौर डॉ. सिद्धार्थ धेंडे, रिपब्लिकन पार्टीचे महाराष्ट्र प्रदेश सचिव बाळासाहेब जानराव, पश्चिम युवक आघाडीचे अध्यक्ष परशुराम वाडेकर, शहराध्यक्ष अशोक कांबळे, सरचिटणीस महिपाल वाघमारे, शहर संपर्क प्रमुख अशोक शिरोळे, कार्याध्यक्ष संजय सोनावणे, युवक अध्यक्ष शैलेंद्र चव्हाण, नगरसेविका हिमाली कांबळे, सुनीता वाडेकर, सोनाली लांडगे, महिला आघाडीच्या शशिकला वाघमारे, प्रियदर्शिनी निकाळजे, बसवराज गायकवाड, नीलेश आल्हाट यांच्यासह शेकडो कार्यकर्ते सहभागी झाले होते. रिपब्लिकन पक्षाच्या शिष्टमंडळाने जिल्हाधिकाऱ्यांना मागण्यांचे निवेदन दिले. तहसीलदार हेमंत निकम यांनी हे निवेदन स्वीकारले. तर कार्यकर्त्यांवरील ३५३ कलमांतर्गत दाखल केलेले गुन्हे मागे घेण्याचे निवेदन पोलीस उपयुक्त मितेश घट्टे यांनी स्वीकारले.
डॉ. सिद्धार्थ धेंडे म्हणाले, “पूर्वीच्या २०० पॉईंट रोस्टर पद्धतीमुळे अनुसूचित जाती जमातींना व ओबीसीला ४९ टक्के मिळत होते. मात्र, सर्वोच्च न्यायालयाच्या निर्णयानुसार १३ पॉईंट रोस्टर पद्धती लागू झाल्यास एससी, एसटी व ओबीसींना लाभ मिळणार नाही. परिणामी समाजात बेकारी वाढेल. त्यामुळे ही १३ पॉईंट रोस्टर पद्धती लागू करू नये. तसेच केंद्र शासनाने अध्यादेश काढून या नोकर भरतीला स्थगिती द्यावी. तसेच सदरची नोकरभरती पूर्वीप्रमाणे २०० पॉईंट रोस्टरनुसार करावी”
बाळासाहेब जानराव म्हणाले, “आंबेडकरी कार्यकर्त्यांवर विनाकारण गुन्हे दाखल करण्यात आलेले आहेत. अनेकांवर ३५३ अंतर्गत गुन्हे नोंदवले आहेत. मुख्यमंत्र्यांनी हे गुन्हे मागे घेणार असल्याची घोषणा केली होती. मात्र, अद्यापही त्याची अंमलबजावणी झालेली नाही.” परशुराम वाडेकर, शशिकला वाघमारे यांनीही कार्यकर्त्यांना संबोधित केले.