पुणे- हेल्मेट सक्ती विरोधी कृती समितीतर्फे हेल्मेट सक्तीच्या निर्णयाविरोधात आणि दंडवसुलीविरोधात पुण्यातील गांजवे चौक ते पोलीस आयुक्त कार्यालयावर सविनय कायदेभंग रॅली काढण्यात आली.
रॅलीच्या प्रारंभी समितीतर्फे सरकार व पोलीस प्रशासनाच्या विरोधात जोरदार घोषणाबाजी करण्यात आली. हेल्मेट सक्ती रद्द करा, पुणेकरांचे हाल, पोलीस झाले मालामाल, हेल्मेट हटाव पुणेकर बचाव अशा घोषणा देत समितीच्या कार्यकर्त्यानी सत्ताधारी व पोलीस प्रशासनाच्या धिक्काराच्या घोषणा दिल्या. या वेळी समितीचे अध्यक्ष सूर्यकांत पाठक, समन्वयक अंकुश काकडे, मोहन जोशी, रुपाली पाटील, धनंजय जाधव, मंदार जोशी आदी उपस्थित होते. या प्रसंगी समितीच्या कार्यकर्त्यांनी , फुले पगडी, शिंदेशाही पगडी, पुणेरी पगडी ,फेटे, गांधी टोपी परिधान करून निषेध नोंदविला.पोलीस आयुक्तांनी या कायदेभंग करून आलेल्या सर्व आंदोलकांना सामोरे जाण्याऐवजी त्यांना आयुक्तालया पासून काही अंतरावरच रोखून निवडक आंदोलकांना कार्यालयात येण्यास परवानगी दिली आणि त्यांच्याकडून निवेदन स्वीकारले . यावेळी पोलीस आयुक्तालया समोर असा यल्गार सुरु होता ..