पुणे- सहकारी गृहनिर्माण संस्थांच्या अध्यक्ष-सचिवांना मतदान केंद्रस्तरीय स्वयंसेवक म्हणून घोषित करण्यात येणार असून या स्वयंसेवकांनी निवडणूकीशी संबंधित कामाची जबाबदारी यशस्वीपणे पार पाडून लोकशाही सक्षमीकरणात महत्त्वपूर्ण योगदान द्यावे, असे आवाहन जिल्हाधिकारी नवल किशोर राम यांनी केले.
जिल्हाधिकारी कार्यालयात आयोजित बैठकीत ते बोलत होते. यावेळी उप जिल्हा निवडणूक अधिकारी मोनिका सिंह, जिल्हा उप निबंधक बी. टी. लवंड, पुणे जिल्हा सहकारी गृहनिर्माण महासंघाचे अध्यक्ष सुहास पटवर्धन आदी उपस्थित होते. सहकारी गृहनिर्माण संस्थेचा निवडणूक विषयक कामात सहभाग घेण्याच्या दृष्टिने पुणे व पिंपरी -चिंचवड महानगरपालिका हद्दीतील सहकारी गृहनिर्माण संस्थेच्या अध्यक्ष-सचिवांची बैठक आयोजित करण्यात आली होती.
जिल्हाधिकारी राम म्हणाले, भारत निवडणूक आयोगाच्या निर्देशानुसार 1 जानेवारी 2019 या अर्हता दिनांकावरआधारित मतदार याद्यांचा विशेष संक्षिप्त पुनरिक्षण कार्यक्रम जिल्ह्यात राबविण्यात येत आहे. या अंतर्गत मतदारांची नोंदणी, दुरुस्ती व वगळणी याबाबत कार्यवाही केली जात आहे. गृहनिर्माण संस्थांमध्येही मोठ्या प्रमाणावर मतदार राहत असल्याने त्यांना निवडणूक विषयक कामकाजात सहभागी करुन घेऊन या संस्थांमधील मतदार यादी अद्ययावत करण्यासाठी तेथील गृहनिर्माण संस्थांच्या अध्यक्ष किंवा सचिवांना मतदान केंद्रस्तरीय स्वयंसेवक (बूथलेव्हल व्हॉलंटीयर्स) घोषित करण्यात येणार आहे. संस्थेतील नवीन मतदारांची नावे नोंदणी करण्यासाठी आणि संस्थेतील मयत, दुबार व स्थलांतरित मतदारांची नावे कमी करण्यासाठी व मतदार यादीतील सध्याची नावे, पत्ता व स्थलांतरित मतदारांची नावे कमी करण्यासाठी व मतदार यादीतील सध्याची नावे, पत्ता व फोटोतील चुकांची दुरुस्ती करण्यासाठी या स्वयंसेवकांची मदत महत्त्वाची ठरणार आहे. संस्थांकडून आलेल्या यादीनुसार मतदार यादी अद्ययावत झाली किंवा नाही, याचा दर आठवड्याला आढावा घेणार असल्याचेही श्री. राम यांनी सांगितले.
सहकारी गृहनिर्माण संस्थांच्या अध्यक्ष-सचिवांना मतदान केंद्रस्तरीय स्वयंसेवक घोषित करुन त्यांना निवडणूक विषयक कामात सहभागी करुन घेण्याचा हा अभिनव उपक्रम प्रथमच राबविला जात असून याला यश येईल,अशी आशा जिल्हाधिकारी राम यांनी व्यक्त केली.
उप जिल्हा निवडणूक अधिकारी मोनिका सिंह यांनी मतदार यादी अद्ययावत होण्यासाठी हा प्रयत्न असून आगामी लोकसभा आणि विधानसभा निवडणुकांच्या पार्श्वभूमीवर पुणे आणि पिंपरी- चिंचवड भागातील महत्त्वाच्या भागात बैठका घेण्यात येणार आहेत. शहरात 16 हजार 360 गृहनिर्माण संस्था असून 6 उपनिबंधक कार्यालये आहेत. या कार्यालयांच्या अखत्यारित मतदार याद्यांच्या अद्ययावतीकरणासाठी प्रयत्न केले जातील. गेल्या 7 दिवसांत मतदारांचे 18 हजार अर्ज प्राप्त झाले असल्याचे त्यांनी सांगितले.