पुणे -महात्मा फुले जयंती निमित्त कॉंग्रेस – राष्ट्रवादी कॉंग्रेस व मित्रपक्षांचे उमेदवार मोहन जोशी यांनी महात्मा फुले
वाडा येथे महात्मा ज्योतिबा फुले आणि क्रांतीज्योती सावित्रीबाई फुले यांच्या पुतळ्यास पुष्पहार अर्पण करून वंदन केले.
याप्रसंगी पुणे शहर कॉंग्रेस सरचिटणीस अजित दरेकर, उमेदवार मोहन जोशी, माजी आमदार दीप्ती चवधरी, पुणे शहर
जिल्हा कॉंग्रेस अध्यक्ष रमेश बागवे, महाराष्ट्र प्रदेश कॉंग्रेस सरचिटणीस अॅड. अभय छाजेडआदी मान्यवर उपस्थित होते .
कोपरासभा सभांसाठीचे शुल्ककमी करण्याची मागणी
दरम्यान लोकसभा मतदार संघात कोपरासभा (कॉर्नर मीटिंग) घेण्यासाठी पुणे महानगरपालीकेने अव्वाच्या
सव्वा शुल्क आकारण्याचा निर्णय घेतला आहे. एका कोपरा सभेसाठी तब्बल साडेसात हजार रुपये शुल्क
आकारण्याचा निर्णय पुणे मनपाने घेतला आहे. या रकमेमध्ये ४ हजार रुपये मूळ फी असून १००० रुपये सभे
नंतरच्या स्वच्छतेसाठीचा आकार आणि २५०० रुपये अनामत रक्कम म्हणून घेण्यात येत आहे. एका कोपरा
सभेला एवढी रक्कम ही खूपच जास्त वाटते. यापूर्वी कोपरा सभेचे दर खूपच कमी होते. पुणे लोकसभा मतदार
संघात एकूण २० लाख ७४ हजार मतदार आहेत. एवढ्या मोठ्या संख्येने मतदार असलेल्या मतदार संघात
मतदाराशी संपर्क करण्यासाठी किमान ३०० कोपरा सभा घेण्याची गरज भासते. मात्र त्यासाठी मोजावी
लागणारी किंमत किमान १५ लाखाच्या घरात जाते. कोणत्याही उमेदवाराच्या संपूर्ण निवडणूक खर्चाला
निवडणूक आयोगाने ७० लाखाची मर्यादा घातली आहे. अशा अवस्थेत केवळ कोपरा सभांवर १५ लाख रुपये
खर्च करणे कोणालाही परवडणारे नाही. मोठ मोठ्या राजकीय पक्षांच्या उमेद्वाराना देखील ही एवढी मोठी
रक्कम परवडत नाही. असे असताना एखाद्या अपक्ष उमेदवाराला तेवढा मोठा खर्च कसा परवडेल. यासाठी
निवडणूक आयोगाने खास लक्ष देऊन कोपरा सभांसाठी पुणे महानगर पालिकेकडून आकारण्यात येणारे शुल्क
कशी कमी करता येईल याकडे त्वरित लक्ष देण्याची गरज आहे.
या संदर्भात पुणे शहर जिल्हा कॉंग्रेस कमिटीचे सरचिटणीस व प्रवक्ते रमेश अय्यर यांनी निवडणूक
आयोगाला खास पत्र पाठवून याबाबत गांभीर्याने निर्णय घ्यावा अशी विनंती केली आहे.