ऐतिहासिक पार्श्वभूमी असलेल्या नृसिंह मंदिराचे जतन व्हावे -अरविंद शिंदे
पुणे : क्रांतीवीर वासुदेव बळवंत फडके यांचे वास्तव्य असलेले आणि असंख्य भाविकांचे श्रध्दास्थान असलेल्या श्री लक्ष्मी नृसिंह मंदिराचे जतन व्हावे याकरिता प्रयत्न करू असे आश्वासन काँग्रेस पक्षाचे महापालिकेतील गटनेते अरविंद शिंदे यांनी शनिवारी दिले.
राज्य शासनाने २०१७ साली मंजूर केलेल्या विकास आराखड्यानुसार रस्ता रुंदीत सदाशिव पेठेतील श्री लक्ष्मी नृसिंह मंदिराचा नगारखाना , सभामंडप असा मोठा भाग जात आहे. अडीचशे वर्षे जुने हे जुने मंदिर म्हणजे नमुनेदार स्थापत्यशैलीची जुन्या ऐतिहासिक पुण्याची ओळख आहे. अशा वास्तू पुण्याच्या मानबिंदू आहेत. त्यांचे जतन व्हायला हवे याकरिता रस्ता रुंदीकरणातून मंदिर वगळण्यात यावे , असे शिंदे यांनी सांगितले. मंदिराला भेट देवून शिंदे यांनी विश्वस्त आणि नागरिकांशी चर्चा केली. मंदिर वाचविण्यासाठी चाललेल्या जनआंदोलनाला त्यांनी पाठिंबा दिला.
महापालिकेच्या पातळीवर शहर सुधारणा समिती, मुख्य सभेत ठराव मांडू असेही त्यांनी सांगितले .
काँग्रेसचे नेते जयंतराव टिळक यांच्या पुढाकाराने ऐतिहासिक वास्तू समितीने येथे नीलफलक लावला, त्या कार्यक्रमात मी सहभागी होतो. सन १९८७च्या विकास आराखडयातील रस्ता रुंदी रद्द करण्यात आली होती अशी माहिती शिंदे यांनी दिली. २०१७ सालच्या मंजूर विकास आराखड्यात अनेक ठिकाणची रस्ता रुंदी रद्द झाली पण येथील ठेवण्यात आली याकडे नागरिकांनी लक्ष वेधले.
क्रांतीवीरांचे वास्तव्य आणि पुरातन मंदिर , श्री लक्ष्मी नृसिंह अनेक घराण्यांचे कुलदैवत आहे त्यामुळेही अनेकांचे ते श्रध्दास्थान आहे हे वैशिष्टय लक्षात घेऊन या वास्तूला यापूर्वीच हेरिटेजचा दर्जा मिळायला हवा होता. अशा या वास्तूसाठी वेळोवेळी आंदोलने करावी लागतात हे खेदजनक आहे , अशी प्रतिक्रिया शिंदे यांनी व्यक्त केली