पुणे – शहरातील युवावर्गाचे शैक्षणिक, व्यावसायिक, वैयक्तिक प्रश्न सोडविण्यासाठी, त्यांना विविध विषयांवर मार्गदर्शन करण्यासाठी, त्यांच्यासाठी व्याख्याने व कार्यशाळा घेण्यासाठी “हॅलो माय फ्रेंड‘ या हेल्पलाइनचे उद्घाटन युवावर्गाच्या उपस्थितीत शुक्रवारी जल्लोषात झाले. या हेल्पलाइनमार्फत 16 ते 25 या वयोगटातील युवक-युवतींच्या विविध समस्या सोडवण्याचा प्रयत्न तज्ज्ञांद्वारे केला जाईल.
पुणे महापालिकेच्या “हॅलो माय फ्रेंड‘ या हेल्पलाइनचे उद्घाटन महापौर दत्तात्रेय धनकवडे यांनी केले. महापालिका आयुक्त कुणाल कुमार, उपमहापौर आबा बागूल, माजी आमदार उल्हास पवार, निवेदक सुधीर गाडगीळ, स्थायी समितीच्या अध्यक्षा अश्विनी कदम, शिक्षणाधिकारी मीनाक्षी राऊत, विवेक वेलणकर, नगरसेवक अरविंद शिंदे, अशोक हरणावळ, रवींद्र माळवदकर, अविनाश बागवे, लक्ष्मी घोडके, अनिरुद्ध पावसकर, अरुण कामठे, संजय कुमार, डॉ. विकास अधिकारी उपस्थित होते. हेल्पलाइनसाठी युवकांनी 18002336850 या विनामूल्य क्रमांकावर दूरध्वनी करावा.
धनकवडे म्हणाले, “”सध्याचे जग स्पर्धेचे असून प्रत्येक जण स्वत:ला सिद्ध करण्यासाठी प्रयत्न करीत आहे. यामध्ये युवावर्गाची संख्या मोठी असल्याने त्यांना काही वेळेस अपयशी व्हावे लागते. या नैराश्यातून त्यांना बाहेर पडण्यासाठी ही हेल्पलाइन मदत करणार आहे.‘‘
कुमार म्हणाले, “”समाजात युवावर्गाच्या मानसिक आरोग्याबद्दल आणि प्रश्नांबद्दल बोलले जात नाही. त्यावर चर्चा होत नाही, ही गंभीर समस्या आहे. अशा प्रकारच्या कारणांमुळे युवावर्गामध्ये नैराश्याची भावना निर्माण होते. त्यांच्यातील नैराश्य दूर करण्यासाठी या हेल्पलाइनचा उपयोग होणार आहे.‘‘
पवार म्हणाले, “”युवक आणि युवतींनी उत्तम व्यक्ती होण्यासाठी प्रयत्न करण्याची आवश्यकता आहे. त्यासाठी त्यांनी समाजातील थोर महापुरुषांचा आदर्श घेतला पाहिजे. स्वत:मध्ये आत्मविश्वास निर्माण करण्याची गरज आहे.‘‘