गेले काही दिवस सातत्याने १६ हजार मेगावॉटपेक्षा अधिक वीज पुरवठा करणाऱ्या महावितरणने मंगळवारी ३७०.९८ दशलक्ष युनिट एवढी वीज पुरवली. आजवरचा हा सर्वाधिक वीज पुरवठा आहे. ऑक्टोबर हिटमुळे विजेच्या मागणीत मोठ्या प्रमाणावर वाढ झाली आहे.
यापूर्वी, पाच ऑक्टोबर रोजी महावितरणने ३६४.५७ युनिट एवढ्या वीज पुरवठ्याचा विक्रम केला होता. तो मंगळवारी मोडला. दिवसभरात १७ हजार २०० मेगावॉट वीज पुरवण्यात आली, तर मागणी १७ हजार ५७३ मेगावॉट एवढी होती. ३७३ मेगावॉट एवढी तूट असल्याने काही प्रमाणात लोडशेडिंग करण्यात आले.
वातावरणातील बदल, कृषी पंपाचा वाढता वापर यामुळे या काळात विजेची मागणी वाढते. गेल्या वर्षी ती १७६९० मेगावॉटपर्यंत गेली होती. परंतु महावितरणने प्रथमच १७२०० मेगावॉटपर्यंत वीज पुरवठा केला. त्यात सर्वाधिक मागणीच्या वेळी महानिर्मितीच्या औष्णिक प्रकल्पातून ५००० मेगावॉट, कोयना प्रकल्पातून १५०० मेगावॉट, उरणच्या गॅस प्रकल्पातून ४०० मेगावॉट, केंद्रीय कोट्यातून ५ हजार मेगावॉट, खासगी कंपन्यांबरोबरच्या करारातून ३४००मेगावॉट आणि आयत्या वेळी पॉवर एक्स्चेंजमधून खरेदी केलेली १५०० मेगावॉट राज्यास उपलब्ध झाल्याचे महावितरणकडून सांगण्यात आले.
सर्वसाधारणपणे सुमारे ८० टक्के राज्य लोडशेडिंगमुक्त करण्यात आले आहे. २० टक्के भागात वीज बील वसुलीचे प्रमाण कमी असून विजेच्या गळतीचे किंवा चोरीचे प्रमाण अधिक असल्याने तेथे नियमानुसार लोडशेडिंग करण्याचे धोरण महावितरणने स्वीकारले आहे.