पुणे-किर्लोस्कर सिस्टिम्स लिमिटेडच्या कार्यकारी संचालक मानसी किर्लोस्कर यांना केंब्रिज, मॅसॅच्युसेट्स येथे नुकत्याच १६ फेब्रुवारीला झालेल्या ‘एमआयटी इंडिया कॉन्फरन्स’मध्ये विशेष भाषणासाठी आमंत्रित करण्यात आले होते. ‘इंडियाज कॉम्पिटिटीव्ह एज’ या संकल्पनेवर आधारित या परिषदेत सरकार, विज्ञान, तंत्रज्ञान, ऊर्जा, वित्तपुरवठा, सामाजिक प्रभाव व चित्रपट उद्योग आदी विविध क्षेत्रांतील वक्त्यांनी व विचारवंतांनी सहभागी होऊन प्रेरणादायी कथा व भारताची यशस्वी कामगिरी मांडली.
मानसी किर्लोस्कर यांनी ‘Education to Free India’ या विषयावर दमदार भाषण देऊन उपस्थित मान्यवरांवर छाप पाडली. त्या म्हणाल्या, “वर्गामध्ये सर्व विद्याशाखांचा समन्वय घडवणे हा विद्यार्थ्यांसाठी शंका, संवाद व आकलनातून शिकण्यास प्रेरणा देणारा मार्ग असतो आणि तो केवळ अमूर्त व वास्तव संकल्पनांच्या सखोल अनुभूतीचे सर्वोत्तम संवर्धन घडवत नाही, तर सांघिक कार्य व परस्परांप्रती आदराची ताकदवान मानवी मूल्येही रुजवतो. जगातील सर्वांत मोठ्या युवा लोकसंख्येच्या नैतिक प्रगतीसाठी हीच मूल्ये महत्त्वाची असतात.”
आपल्या भाषणाचा समारोपही तितक्याच प्रभावी पद्धतीने करताना मानसी म्हणाल्या, “भारत हे एक महान राष्ट्र आहे. त्याची भव्यता वर्षानुवर्षे काळजीपूर्वक रक्षण केलेल्या संस्कृतीच्या संचयात आहे. श्रद्धा, आहार, वेशभूषा व भाषा यात विविधता असणारे लोक येथे शांतीपूर्वक एकत्र राहतात. आमची ताकद आमच्या वैविध्यात आहे आणि अभिनवता हे या वैविध्याचे फलित असेल. असहिष्णुतेच्या प्रकारातून मुक्त होऊन आपण सर्वांना एकत्र आणणारी शिक्षण व्यवस्था निर्माण करुया.”
मानसी किर्लोस्कर यांची नुकतीच शाश्वत विकास ध्येयांसाठी फर्स्ट युनायटेड नेशन्स इन इंडिया यंग बिझनेस चॅम्पियन म्हणून नियुक्ती झाली आहे. मानसी यांनी ‘केअरिंग विथ कलर’ हा सामाजिक विनानफा नवउद्योग स्थापन केला आहे. वंचित गटातील विद्यार्थ्यांसाठी शाळांत शिक्षणाचे रुप पालटून टाकण्याचे या उद्योगाचे ध्येय आहे.