- उत्पादनाच्या विकासावर लक्ष केंद्रित करण्याचा दोन्ही कंपन्यांमध्ये धोरणात्मक करार
- नवी मध्यम आकाराची एसयूव्ही विकसीत होणार महिंद्राच्या वाहनांच्या धर्तीवर आणि ’पॉवरट्रेन’वर
महिंद्रा समूह आणि फोर्ड मोटर कंपनीने भारतात आपली धोरणात्मक भागिदारी आणखी बळकट करण्याचे ठरविले आहे. याचाच एक भाग म्हणून या दोन्ही कंपन्या एक मध्यम आकाराचे नवे स्पोर्ट युटिलिटी वाहन संयुक्तरित्या विकसीत करणार आहेत. याबाबतचा करार उभय कंपन्यांनी नुकताच केला.
या करारान्वये दोन्ही कंपन्या भारत व अन्य उदयोन्मुख देशांसाठी मापदंड ठरणारे एक विशेष वाहन विकसीत करणार आहेत. महिंद्र आणि फोर्ड यांच्यात हे धोरणात्मक सहकार्य सप्टेंबर 2017 पासूनच सुरू झाले. ’पॉवरट्रेन शेअरींग’ची आणि ’कनेक्टेड कार सोल्युशन्स’ काढण्याची घोषणा ऑक्टोबर 2018 मध्ये त्यांनी केली होती. हेच त्यांचे आपसातील सहकार्य नव्या कराराने अधिक बळकट झाले आहे.
नवीन मिड-साईझ स्पोर्ट्स युटिलिटी व्हेईकल (सी-एसयूव्ही) मध्ये महिंद्रचे सध्याचे उत्पादन प्लॅटफॉर्म आणि पॉवरट्रेन असेल. त्याद्वारे वाहनाची अभियांत्रिकी आणि व्यावसायिक कार्यक्षमता वाढविण्यात येणार आहे.
’महिंद्र अन्ड महिंद्र लिमिटेड’चे व्यवस्थापकीय संचालक डॉ. पवन गोयंका म्हणाले, “आम्ही केलेल्या महत्त्वपूर्ण प्रगतीमुळे आणि 2017 मध्ये फोर्डबरोबरच्या आमच्या धोरणात्मक भागिदारीच्या घोषणेनंतर निर्माण झालेल्या सृजनशीलतेमुळे मला खूप आनंद झाला आहे. आजच्या घोषणेमध्ये आमच्या दोघांच्या सहकार्याचे आणखी एक महत्त्वपूर्ण पाऊल आहे. दोन्ही कंपन्या अनेक क्षेत्रांमध्ये संयुक्त विकासासाठी एकत्र आलेल्या असून यापुढेही एकसमान प्लॅटफॉर्मचा वापर करुन उत्पादनांचा विकास करण्यासाठी एकत्र कार्य करत राहतील. यामुळे उत्पादन विकास खर्च कमी होईल आणि दोन्ही कंपन्यांचा आर्थिक फायदा होईल.”
फोर्ड कंपनीच्या नवीन व्यवसाय, तंत्रज्ञान व धोरण विभागाचे अध्यक्ष जिम फर्ली या प्रसंगी म्हणाले, ’’आजच्या नव्या कराराच्या घोषणेमुळे आम्ही महिंद्राबरोबरची आमची चालू भागीदारी मजबूत करीत आहोत. तसेच भारतासारख्या महत्त्वपूर्ण उदयोन्मुख बाजारपेठेत आमची स्पर्धात्मकताही वाढवीत आहोत. “फोर्ड’चे तांत्रिक नेतृत्व आणि ’महिंद्र’चे कार्यान्वयाचे व उत्पादनाचे यशस्वी ठरणारे कौशल्य यांच्या संयुक्त विद्यमाने एकत्रितपणे एक वाहन विकसीत करण्यात येत आहे, जे भारतीय ग्राहक तसेच इतर उदयोन्मुख बाजारपेठांच्या अपेक्षा पूर्ण करेल.”
धोरणात्मक भागिदारीमुळे दोन्ही कंपन्यांची स्वतःची वैशिष्ट्ये अधोरेखीत होणार आहेत. ’फोर्ड’चे जागतिक पातळीवरील अस्तित्व व कसब आणि ’महिंद्र’चा भारतातील मोठ्या व्याप व यशस्वी संचालनाचे मॉडेल या दोन्ही वैशिष्टयांवर लक्ष केंद्रित करण्यात येत आहे. दोन्ही कंपन्यांनी विद्युतीकरण,वितरण व उत्पादन विकास अशा परस्परसंबंधांच्या सर्व क्षेत्रांवर सहयोग करणे सुरू ठेवले आहे.
’फोर्ड’च्या सध्याच्या व भविष्यातील वाहनांमध्ये वापरण्यासाठी ’लो-डिसस्प्लेसमेंट’ पेट्रोल इंजिन विकसित करून पुरविण्यासाठी ’फोर्ड’ने या आर्थिक वर्षाच्या सुरुवातीस महिंद्र समुहाशी करार केला आहे. हे उत्पादन 2020मध्ये सुरू होईल. महिंद्रा व फोर्ड यांनी ’टेलिमॅटिक्स कंट्रोल युनिट’चा संयुक्त विकास करण्याचीही घोषणा केलेली आहे.
’महिंद्र’ने मागील सात दशकांपासून भारतातील ’युटिलिटी व्हेईकल’ क्षेत्रात आघाडी घेतलेली आहे. जागतिक स्तरावर उपलब्ध असलेल्या विद्युतीय वाहनांच्या पोर्टफोलिओसह स्वच्छ आणि परवडणाऱ्या तंत्रज्ञानाच्या विकासासाठी अग्रगण्य असलेल्या काही जागतिक कंपन्यांमध्ये ’महिंद्र’चा समावेश झालेला आहे. आपल्या जागतिक उपस्थितीचा विस्तार करून ’महिंद्र’ने कोरियामधील सॅन्गॉंग मोटर कंपनीतील बहुतांश हिस्सा विकत घेतला आहे. तसेच अमेरिकेतील ’राईड-शेअरींग’ क्षेत्रात गुंतवणूक करून ’महिंद्र’ने ’शेअर्ड मोबिलिटी स्पेस’मध्ये प्रवेश केला आहे. ’जेनझी’ ही जगातील पहिली इलेक्ट्रिक कनेक्ट स्कूटरही महिंद्रने विकसीत केली आहे.
भारतात 1995 मध्ये प्रवेश करणाऱ्या बहुराष्ट्रीय कंपन्यांपैकी फोर्ड ही एक आहे. सध्या ही कंपनी भारतातील सर्वाधिक कार निर्यात करणाऱ्यांपैकी एक बनली आहे. तामिळनाडूतील चेन्नई आणि गुजरातमधील साणंद येथे ’फोर्ड’चे कारखाने आहेत. तेथे वाहने व इंजिने उत्पादीत व निर्यात करण्यात येतात. नवी दिल्ली, चेन्नई आणि कोयंबतूर या शहरांमध्ये ’फोर्ड इंडिया’ आणि ’फोर्ड ग्लोबल बिझिनेस सर्व्हिसेस ऑपरेशन्स’मध्ये 14,000 हून अधिक लोक काम करत असून, जागतिक स्तरावर ’फोर्ड’च्या कर्मचाऱ्यांची संख्या सर्वाधिक असणारा भारत हा दुसरा देश आहे. .