शार्क माशासारख्या आकाराचे ‘मॅराझो’चे डिझाईन
· महिंद्र नॉर्थ अमेरिकन टेक्निकल सेंटर आणि महिंद्र रिसर्च व्हॅली यांनी चेन्नईमध्ये तयार केली ‘मॅरोझो’
· पिनिनफिना आणि महिंद्र डिझाईन सेंटर यांचे डिझाईनसाठी संयुक्त प्रयत्न
· या आर्थिक वर्षातील दुसऱ्या तिमाहीमध्ये दाखल होणार बाजारात
मुंबई, 31 जुलै, 2018 ः महिंद्र अॅन्ड महिंद्र कंपनीच्या यू-321 या कारच्या आगामी नव्या मॉडेलचे नामकरण ‘मॅराझो’ असे केले आहे. बास्क या स्पॅनिश भाषेच्या उपभाषेतील मॅराझो हा शब्द असून त्याचा अर्थ शार्क असा होतो. ‘यू-321’ या गाडीचे डिझाईन शार्क माशासारखे भासत असल्याने हे नाव या गाडीला देण्यात आले आहे.
महिंद्र डिझाईन स्टुडिओ आणि इटालीतील डिझाईन कंपनी पिनिनफरिना यांनी संयुक्तरित्या ‘मॅराझो’चे डिझाईन बनविले आहे. महिंद्रच्या बोल्ड स्वरुपाच्या आणि नव्या दमाच्या गाड्यांची प्रतिमा या डिझाईनमधून प्रतीत व्हावी, हा प्रयत्न यातून करण्यात आला आहे. ‘मॅराझो’चा आकार, ठेवण ही शार्क माशासारखी असून पुढील भागातील ग्रिल हे शार्कच्या दातांची आठवण करून देतात. गाडीचा टेल लॅम्पची ढबदेखील शार्कच्या शेपटीसारखी आहे. यातून ही गाडी अतिशय आक्रमक असल्याचे चित्र उभे करण्यात आले आहे.
मॅराझो हे जागतिक स्तरावर विकसीत करण्यात आलेले उत्पादन आहे. महिंद्र नॉर्थ अमेरिकन टेक्निकल सेंटर (एमएनएटीसी) व चेन्नई येथील महिंद्र रिसर्च व्हॅली (एमआरव्ही) येथे मॅराझो हे वाहन घडविण्यात आले. या मॉडेलमध्ये अभियांत्रिकी उत्कृष्टता आणि नवीन स्वरुपाची कलात्मकता आणण्यासाठी, ‘एमएनएटीसी’मधील अभियंत्यांची जागतिक स्वरुपाची क्षमता तसेच ‘एमआरव्ही’मधील तज्ज्ञ पथकाचे कौशल्य हे महत्वपूर्ण ठरले आहे. अतिशय आरामशीर प्रवास, चपळपणा, भरपूर जागा आणि शांत केबिन अशी वैशिष्ट्ये असलेल्या ‘मॅराझो’च्या या बांधणीचे पेटंट घेण्यात आले आहे.
‘मॅराझो’च्या नामकरण प्रसंगी महिंद्र अॅन्ड महिंद्र लिमिटेडचे व्यवस्थापकीय संचालक डॉ. पवन गोयंका म्हणाले, ” शार्क ही प्रेरणा असलेल्या ‘मॅराझो’मुळे महिंद्रच्या आगामी उत्पादनांची दिशा निश्चित होत आहे. पिनिनफरीना, महिंद्र डिझाईन स्टुडिओ, एमएनएटीसी आणि महिंद्र रिसर्च व्हॅली या सर्वांनी परिश्रम घेतले आणि ग्राहकांच्या आकांक्षा लक्षात घेऊन त्यांना एक आंतरराष्ट्रीय दर्जाचे वाहन देण्याच्या दृष्टीकोनातून मॅराझो तयार करण्यात आली.
महिंद्र अॅन्ड महिंद्रच्या वाहन निर्मिती विभागाचे प्रमुख राजन वधेरा म्हणाले, की ‘मॅराझो’ची बांधणी व तिचा विकास यांची प्रक्रिया लक्षात घेता, जागतिक श्रेणीतील इतर कोणत्याही वाहनाची ‘मॅराझो’शी तुलना करता येईल. गाडीतील प्रशस्त जागा, आरामदायीपणा, शांत केबिन, उत्कृष्ट प्रतीची कूलिंग यंत्रणा, उत्कॉष्ट सुरक्षा आणि दणकट बॉडी ही ‘मॅराझो’ची वैशिष्ट्ये आहेत. व्हीलबेस आणि फ्रंट ट्रॅक यांची रचना महिंद्रच्या अन्य मॉडेल्सपेक्षा मोठी आहे. त्यामुळेच मॅराझो ही एक बेंचमार्क तयार करील आणि तिच्या श्रेणीत ती एक गेम-चेंजर बनेल, असा विश्वास वाटतो.
गुणवत्ता, तंत्रज्ञान, चाचणी आणि वैधता मानदंड, सुरक्षितता, विनियम आणि वायूंचे उत्सर्जन या जागतिक मानकांनुसार महिंद्रा मॅराझो ही एक बेंचमार्क बनलेली आहे. मॅराझोच्या अत्यंत कठोर चाचण्या घेण्यात आल्या आहेत. महाराष्ट्रातील नाशिक येथील कंपनीच्या कारखान्यात ‘मॅराझो’चे उत्पादन करण्यात येईल. आर्थिक वर्ष –2019 च्या दुसऱ्या तिमाहीमध्ये हे वाहन बाजारात आणण्यात येणार आहे.