‘स्वप्न बघणा-या आणि जगणा-या माणसांची गोष्ट’ सांगणारा आणि अंकुश चौधरी व मुक्ता बर्वे यांच्या सहजसुंदर अभिनयाने सजलेला ‘डबल सीट’ हा चित्रपट १४ ऑगस्टपासून प्रेक्षकांच्या भेटीस येत असून राज्यभरातील तब्बल 300 चित्रपटगृहांमधून (6000 shows )तो प्रदर्शित होणार आहे. मायानगरी असलेल्या मुंबई शहरातील एका सर्वसामान्य जोडप्याची ही गोष्ट सर्वच स्तरातील प्रेक्षकांना भुरळ घालणारी आहे. क्षितीज पटवर्धन यांची कथा आणि समीर विद्वांस यांचे दिग्दर्शन असलेला हा चित्रपट एस्सेल व्हिजनच्या माध्यमातून प्रदर्शित होत आहे.
‘डबल सीट’ चित्रपटाची कथा जरी मुंबईतल्या जोडप्याची असली तरी ही गोष्ट सर्वच शहरातील मध्यमवर्गीय घरातील जोडप्याची आणि त्यांच्या स्वप्नांची आहे. आयु्ष्य जगतांना कायम विशिष्ट चौकटीतला आणि आवाक्यातलाच विचार करायचा ही मध्यमवर्गीय कुटुंबाची मानसिकता असते. ती चौकट मोडून त्या बाहेर उडी घ्यायचं स्वप्न बघण्याची आणि ते पूर्ण होण्यासाठी घ्याव्या लागणा-या कष्टाची ही गोष्ट आहे. मग हे स्वप्न एखादी गाडी घेण्याचं असो, घरातील नवीन मोठी वस्तू घेण्याचं असो किंवा नवीन घरच घेण्याचं असो त्यासाठी मेहनत ही करावीच लागते. असाच संघर्ष अमित नाईक आणि त्याची बायको मंजिरी नाईकचा आहे. कुरीअर कंपनीत काम करणारा अमित आणि खाजगी विमा कंपनीत काम करणारी मंजिरी हे लालबागमधील जुन्या चाळीतील घरात राहणारं मध्यमवर्गीय जोडपं. या दोघांची स्वप्न खुप छोटी छोटी आहेत आणि आपल्या या आयुष्यात ते आनंदीही आहेत. चाळीतील छोट्याशा घरात एकत्र कुटुंबात मंजिरी आणि अमित आनंदी असले तरी त्यांना हव्या असलेल्या ‘स्पेस’ची उणिव दोघांनाही जाणवतेय. ज्यामुळे दोघांची एक विचित्र घुसमट सुरू आहे. यातून बाहेर पडण्यासाठी अमित नवं घर घेण्याचं स्वप्नं बघतो आणि मंजिरीसहित घरातील सर्वजण त्याच्या पाठीशी उभे राहतात आणि इथून सुरू होतो प्रवास त्याच्या मेहनतीचा. हे स्वप्न पूर्ण करतांना त्याला कोणते अडथळे येतात? त्यांच्या मदतीला कोण धावून येतं ? या संघर्षात त्याचा विजय होतो का ? या सर्वाची गोष्ट म्हणजे ‘डबल सीट’ हा चित्रपट.
युट्युब आणि सोशल नेटवर्कवर सध्या या चित्रपटाची जोरदार हवा आहे. यातील सर्वच गाणी श्रवणीय झाली असून ती प्रेक्षकांच्या पसंतीस उतरली आहेत. अंकुश चौधरी आणि मुक्ता बर्वे यांचा सहजसुंदर अभिनय सोबतीला वंदना गुप्ते, विद्याधर जोशी, संदीप पाठक, आसावरी जोशी, पुष्कर श्रोत्री अशा कसलेल्या कलाकारांची साथ हे या चित्रपटाचं वैशिष्ट्य. सर्वसामान्य माणसांच्या स्वप्नांची आणि त्या स्वप्नपूर्तीसाठी घ्याव्या लागणा-या ‘उडी’ची ही अतिशय सकारात्मक दृष्टीकोन देणारी गोष्ट येत्या १४ ऑगस्टपासून प्रेक्षकांच्या भेटीस येत आहे.