मुंबई -अंधश्रद्धा निर्मूलन समितीचे संस्थापक अध्यक्ष डॉ. नरेंद्र दाभोलकर यांच्या हत्याप्रकरणाचा छडा लावण्यात महाराष्ट्र दहशतवादविरोधी पथकाला (एटीएस) अखेर पाच वर्षांनी यश आले आहे. हिंदुत्ववादी संघटनेचा कार्यकर्ता वैभव राऊत आणि त्याच्या दोन सहकाऱ्यांच्या चौकशीतून त्यांच्यापैकी एकाचा दाभोलकर यांच्या हत्येमध्ये थेट संबंध असल्याचे उघड झाले. त्यांनी दिलेल्या माहितीनुसार, दाभोलकर यांच्यावर गोळ्या झाडणाऱ्या सचिन प्रकाशराव अंदुरे याला सीबीआयच्या पथकाने शनिवारी औरंगाबाद येथून अटक केली. सचिन अंदुरे हा एटीएसने अटक केलेल्या शरद कळसकर याचा खास मित्र आहे. सचिन त्याच्या वारंवार संपर्कात होता. दाभोलकर यांच्या हत्येसाठी वापरण्यात आलेली मोटरसायकल शरद याने दिली होती. वैभव, शरद आणि सुधन्वा यांच्याकडे अनेक नंबर प्लेटस सापडल्या. यापैकी कोणती नंबर प्लेट वापरली आहे का याचा तपास एटीएसचे अधिकारी करीत आहेत. सचिन अंदुरे हा देखील हिंदुत्ववादी संघटनेचा कार्यकर्ता असून त्यानेच दाभोळकर यांच्यावर गोळ्या झाडल्या होत्या. याप्रकरणातील मुख्य आरोपी सारंग अकोलकर अद्याप फरार आहे. मात्र आता दाभोळकरांच्या हत्येचा खरा सूत्रधार आता सीबीआय च्या नजरेच्या टप्प्यात आल्याचे खात्रीलायक वृत्त आहे .ज्याला पकडणे फारसे अवघड उरलेले नाही .आणि सीबीआय यावर काय कारवाई कशा पद्धतीने करेल हे येणारा काळच स्पष्ट करणार आहे.
डॉ. नरेंद्र दाभोलकर यांच्यावर २० ऑगस्ट २०१३ रोजी सकाळी पुण्यातील ओंकारेश्वर मंदिराकडे जाणाऱ्या पुलावर दुचाकीवरून आलेल्या दोघांनी गोळ्या झाडल्या. यामध्ये दाभोलकर यांचा मृत्यू झाला. याप्रकरणी पुणे येथील डेक्कन पोलिस ठाण्यात गुन्हा आला होता. तेव्हापासून एटीएससह अनेक तपास यंत्रणा हल्लेखोरांचा शोध घेत होते. गेल्या आठवड्यात शुक्रवारी महाराष्ट्र एटीएसने नालासोपारा येथील भंडारआळीत छापा टाकला. वैभव राऊत याच्याकडून शस्त्रे आणि स्फोटकांचा मोठा साठा जप्त केला. त्याच्या संपर्कात असलेल्या शरद कळस्कर आणि सुधन्वा गोंधळेकर यांनाही अटक करण्यात आली. या तिघांची आठ दिवस कसून चौकशी केल्यानंतर पुण्याहून पकडण्यात आलेल्या आरोपीचा डॉ. दाभोलकर यांच्या हत्येमध्ये थेट सहभाग असल्याचे उघडकीस आले. त्याने दाभोलकर यांच्यावर गोळ्या झाडणाऱ्या सचिन अंदुरे याचे नाव सांगितले. या प्रकरणाचा तपास सीबीआय करीत असल्याने एटीएसने याबाबतची माहिती सीबीआयला दिली. या माहितीच्या आधारे सीबीआयने औरंगाबाद येथील कुवारफल्ली या गावात छापा टाकून सचिन अंदुरे याला अटक केली.
पानसरे हत्येचाही उलगडा होणार
डॉ. दाभोलकर यांच्याप्रमाणेच मोटारसायकलवरून आलेल्या दोघांनी कॉम्रेड गोविंद पानसरे यांची २० फेब्रुवारी २०१५ रोजी कोल्हापूरमध्ये गोळ्या झाडून हत्या करण्यात आली होती. या दोन्ही हत्यांमध्ये बरेच साधर्म्य असल्याने सचिन अंदुरे याच्या चौकशीतून पानसरे यांच्या हत्येचाही उलगडा होण्याची शक्यता व्यक्त केली जात आहे.
– अॅड. मुक्ता दाभोलकर
दाभोलकर हत्याप्रकरणात अंदुरेला केलेली अटक ही महत्त्वाची घडामोड आहे. यानंतर तपासयंत्रणा या कटाच्या मूळापर्यंत पोहोचतील अशी आमची भावना आहे. उच्च न्यायालयाने तपासप्रक्रियेतील देखरेखीची महत्त्वाची भूमिका बजावली आहे. आता या सगळ्या तपासप्रक्रियेतून खुनी तसेच सूत्रधारांपर्यंत निश्चितपणे पोहोचता येईल. हे लवकरात लवकर घडणे गरजेचे आहे. डॉक्टरांच्या खुनाचा तपास वेळीच लागला असता तर पुढील खून टळले असते.
नरेंद्र दाभोलकर हत्येप्रकरणी तपासातील महत्त्वाचा घटनाक्रम :
2013-
20 ऑगस्ट- डॉ. नरेंद्र दाभोलकर यांची हत्या
गुन्हे शाखेची तपास पथके रवाना, सीसीटीव्ही चित्रीकरण ताब्यात
22 ऑगस्ट- घटनास्थळावरील पुरावे न्यायवैद्यक प्रयोगशाळेत पाठविले
23 ऑगस्ट- पोलिस ठाण्यांच्या पातळीवर तपास पथके
25 ऑगस्ट- भोंदूबाबा, बनावट डॉक्टर, ज्योतिषी यांची चौकशी सुरू
26 ऑगस्ट- तत्कालीन एटीएस प्रमुख आणि पुणे पोलिसांची एकत्रित बैठक
27 ऑगस्ट-मुख्यमंत्र्यांकडून पोलिसांना तपासाबाबत सूचना
28 ऑगस्ट- दुचाकींच्या नंबरप्लेट, सराईत आणि पॅरोलवरील गुन्हेगारांची चौकशी सुरू
29 ऑगस्ट-सीसीटीव्ही कॅमेऱ्यांचे चित्रीकरण तपासणीसाठी मुंबई आणि तेथून लंडनला
29 ऑगस्ट-गोव्यातील आश्रमातून एक साधक ताब्यात
30 ऑगस्ट-सुमारे आठ कोटी फोन कॉलसह ई-मेलची तपासणी सुरू
2 सप्टेंबर-संशयितांचे रेखाचित्र तयार, बॅलेस्टिक अहवाल पोलिसांना प्राप्त
6 सप्टेंबर- रेखाचित्राशी साधर्म्य असलेल्या 17 जणांची चौकशी
19 डिसेंबर-मनीष नागोरी आणि विकास खंडेलवाल या दोघांना कोठडी
2014-
16 जानेवारी-गुन्हे शाखेकडून नव्याने तपास सुरू
13 मार्च- नागोरी आणि खंडेलवालची प्रत्यक्षदर्शींकडून ओळखपरेड
3 एप्रिल-विशेष तपास पथकाची (एसआयटी) स्थापना
9 मे-गुन्हे शाखेकडून तपास सीबीआयकडे सोपविला
3 जून-तपासाची कागदपत्रे सीबीआयच्या ताब्यात
6 जून-सीबीआय अधिकाऱ्यांकडून घटनास्थळाची पाहणी
15 नोव्हेंबर-दाभोलकर हत्या प्रकरणाच्या चौकशीत गांभीर्याने लक्ष घालण्याचे मुख्यमंत्री देवेंद्र फडणवीस यांचे आश्वासन
2015 –
2 ऑगस्ट-तपासाबाबत अंनिसचे राष्ट्रपतींना पत्र
21 नोव्हेंबर-मारेकऱ्यांचे रेखाचित्र पुन्हा एकदा प्रसिद्ध
3 डिसेंबर-डॉ. दाभोलकर, पानसरे व कलबुर्गी यांच्या हत्येचा परस्परांशी संबंध नाही – गृह राज्यमंत्र्यांची राज्यसभेत माहिती
2016 –
17 फेब्रुवारी-“सनातन’चे साधक नीलेश शिंदे, हेमंत शिंदेच्या न्यायवैद्यक चाचणीस (पॉलिग्राफ टेस्ट) न्यायालयाची मंजुरी
31 मे-सीबीआयचे वीरेंद्र तावडे (पनवेल) व सारंग अकोलकर (पुणे) यांच्या घरी छापे
4 जून-सीबीआय तपासासाठी लंडनच्या स्कॉटलंड यार्डची मदत घेण्याबाबत चर्चा
14 जून-वीरेंद्र तावडे हाच मुख्य सूत्रधार असल्याचा सीबीआयचा न्यायालयात दावा
16 जून-मडगाव स्फोट, मिरज दंगलीत तावडेचा हात
18 जून-मारेकऱ्यांना पोलिस अधिकाऱ्याने प्रशिक्षण दिल्याची चर्चा
18 जून-दहशतवाद विरोध पथकाचा (एटीएस) कोल्हापुरातील 13 जणांवर “वॉच’
2017 –
1 मार्च-मारेकऱ्यांची माहिती देणाऱ्यास सीबीआय व मुंबई गुन्हे शाखेतर्फे पाच लाखांचे बक्षीस जाहीर
20 मे-तपासासाठी स्पेशल टास्क फोर्स नेमण्याची “अंनिस’ची मागणी
5 ऑक्टोबर- न्यायालयाने वीरेंद्र तावडे याचा जामीन अर्ज फेटाळला
2018-
21 मे-पत्रकार गौरी लंकेश यांच्या हत्येप्रकरणी पिंपरी-चिंचवडच्या अमोल काळेसह पाच जणांना कर्नाटक “एसआयटी’कडून अटक
30 जून-अमोल काळे याच्याकडील डायरी जप्त, डायरीत वैभव राऊतचा उल्लेख, कर्नाटक-महाराष्ट्रातील लेखक, विचारवंतांसह 36 जण “हिट लिस्ट’वर.
6 जुलै-न्यायालयाने वीरेंद्र तावडेचा जामीन अर्ज पुन्हा एकदा फेटाळला
10 ऑगस्ट-अमोल काळेच्या डायरीनुसार मुंबईतून वैभव राऊतसह सुधन्वा गोंधळेकर, शरद कळसकर यांना अटक
11 ऑगस्ट-राऊतसह दोघांचा दाभोलकर, पानसरे, कलबुर्गी यांच्या हत्येच्या प्रकरणात समावेश असल्याचा पोलिसांना संशय
कोण आहे सचिन अंदुरे?
– सचिन हा मूळचा दौलताबादचा रहिवासी
– औरंगाबादमधील राजाबाजारमधील वेणू निवास इमारतीत भाड्याने वास्तव्य
– औरंगाबादमध्ये पत्नी व तीन महिन्यांच्या मुलीसह दहा महिन्यांपासून वास्तव्य
– औरंगाबाद सासरवाडी असलेल्या सचिनला एक मोठा भाऊ
– निराला बाजार भागातील एका कापड दुकानात नोकरी
– अंदुरेच्या अटकेपासून त्याच्या राजाबाजारमधील घराला कुलूप
– सचिन दहिहंडी, मिरवणुकांमध्ये असायचा सहभागी
– सचिनचा कोणाशीही वाद नसल्याची शेजाऱ्यांची माहिती
– सचिनच्या फेसबुक अकाउंटवर केवळ प्रखर हिंदुत्ववादी पोस्ट