४८.७८ चौरस मीटर आकाराच्या या चित्रात हिमालयाचे एकच दृश्य रेखाटले असून त्याने अमेरिकेतील २२.४६ चौरस मीटर आकाराच्या चित्राचा याआधीचा सर्वाधिक मोठ्या चित्राचा विक्रम मोडला.
पुणे-भारतातील प्रख्यात कलावंतांपैकी एक आणि आंतरराष्ट्रीय पातळीवर गौरवलेल्या संदीप सिन्हा या पुणेस्थित चित्रकाराने ऐतिहासिक कामगिरी करत भारताच्या गौरवात अभिमानास्पद भर घातली आहे. संदीप सिन्हा या चित्रकाराने रेखाटलेल्या जगातील सर्वांत मोठ्या व्यावसायिक तैलचित्रासाठी प्रतिष्ठेचा गिनीज वर्ल्ड रेकॉर्ड्स (जीडब्ल्यूआर) बहुमान प्राप्त केला आहे.
यासंदर्भात सांगताना संदीप म्हणाले, “गिनीज वर्ल्ड रेकॉर्ड्सने एकाच चित्रकाराने रेखाटलेल्या जगातील सर्वांत मोठ्या व्यावसावसायिक तैलचित्रासाठी विजेता म्हणून भारताच्या नावाची घोषणा केली तेव्हा तो माझ्यासाठी अत्यंत अभिमानाचा क्षण होता. हा विक्रम यापूर्वी अमेरिकेच्या नावावर २२.४६ चौरस मीटर आकाराच्या चित्रासाठी जवळपास चार वर्षे जमा होता. आपण ४८.७८ चौरस मीटर आकाराचे चित्र रेखाटून तो विक्रम मोडला आहे.”
संदीप यांच्या तैलचित्रातून हिमालयातील ग्रामीण देखावा प्रतित होतो. संदीप यांच्या चित्रांच्या गेल्या २५ व २६ ऑक्टोबर २०१८ रोजी राजा रविवर्मा आर्ट गॅलरीमध्ये झालेल्या ‘आवाहन – अवेकनिंग द गॉडेस विदीन’ या एकल चित्रप्रदर्शनात हे तैलचित्र प्रथम प्रदर्शित करण्यात आले होते. या प्रदर्शनाचे उद्घाटन स्वतः असामान्य चित्रकार असलेल्या मानसी किर्लोस्कर यांच्या हस्ते झाले होते.
“या चित्राचे शीर्षक ‘हिमाखन’ आहे. त्याचा अर्थ हिमालयासारखा खंबीर मनाचा आणि लोण्यासारखा (माखन) मृदू अंतःकरणाचा असा आहे. माखन हे माझ्या वडिलांचेही नाव असल्याने मी चित्राला ते शीर्षक दिले. तैलचित्र पूर्ण करायला मला अडीच महिने लागले. जागतिक विक्रमाच्या नियमांनुसार असे चित्र एकच देखावा रेखाटलेले (सिंगल सीन) असावे लागते. त्यामुळे मी निसर्गाची प्रतिकात्मकता आणि भव्यता रसिकांपर्यंत पोचवण्याच्या हेतूने माझ्या कलाप्रकारासाठी हिमालय पर्वतरांगा ही संकल्पना निवडली,” असे संदीप सिन्हा यांनी स्पष्ट केले. संदीप यांनी आपले हे चित्र ॲसिड हल्ल्यातून वाचलेल्या महिलांना समर्पित केले आहे. हिमालय हा सर्व आव्हानांना तोंड देऊन खंबीर उभा असतो, तशाच हल्ल्यातून वाचलेल्या महिलाही निर्धाराने जीवनात उभ्या आहेत, असे संदीप यांनी आदराने नमूद केले.
‘हे माझे यश माझे कुटूंब, मित्र आणि हितचिंतकांचेही आहे, ज्यांच्या पाठिंब्याखेरीज हे हिमालयाएवढे उत्तुंग आव्हान पेलणे शक्यच झाले नसते,’ या शब्दांत संदीप यांनी गौरवपूर्ण समारोप केला.
संदीप हे माहिती तंत्रज्ञान व्यावसायिक असून ते टेकमहिंद्र कंपनीत काम करतात. ते स्वयंप्रज्ञ अमूर्त चित्रकार असून याआधी त्यांनी वर्ष २०१५ मध्ये आपल्या लघुचित्रांद्वारे (मिनिएचर पेंटिंग्ज) आणखी एक विक्रम प्रस्थापित केला आहे. त्याअंतर्गत त्यांनी ‘जीवन आणि वैश्विक तापमानवाढ’ (लाईफ अँड ग्लोबल वॉर्मिंग) या संकल्पनेवर आधारित एक सेंटीमीटर लांबी-रुंदीच्या आकाराची ९४५ लघुचित्रे १४ इंच गुणिले ११ इंच आकाराच्या कॅनव्हासवर साकारली होती. या कलाकृतीला कलारसिकांकडून खूपच वाखाणले गेले आणि जागतिक मान्यताही मिळाली.