बांधकाम क्षेत्रात आपले नाव प्रस्थापित केल्यानंतर आता पुण्याच्या ‘पुष्पगंगा व्हेंच्युअर्स’ने संगीत जगतात पदार्पण केले असून ‘पेहली गूंज’ हा आपला पहिला हिंदी गाण्यांचा आल्बम सादर केला आहे. प्रशंसनीय वैशिष्ट्य म्हणजे या आल्बममधून नव्या प्रतिभाशाली तरुण गायकांना प्रसिद्धी देण्यात आली आहे. त्यातील दोन गायकांनी टीव्हीवरील ‘व्हॉईस इंडिया किड्स’ आणि ‘सा रे ग म प लिटिल चॅम्प्स’ या लोकप्रिय संगीत कार्यक्रमात आपल्या यशस्वी कामगिरीने नाव व प्रसिद्धी मिळवली आहे.
यासंदर्भात ‘पुष्पगंगा व्हेंच्युअर्स’चे व्यवस्थापकीय संचालक अम्मुल गोएल म्हणाले, “आम्ही असामान्य प्रतिभाशाली अशा तीन तरुण गायकांना सादर करत आहोत. त्यांची गाणी या आल्बमद्वारे सादर करुन आम्ही त्यांच्यासाठी एक व्यासपीठ निर्माण करण्याचे ठरवले आहे. यापुढची पायरी म्हणजे या गायकांच्या संगीत मैफलींचे देशभरातील सर्व प्रमुख शहरांत, तसेच परदेशांतही आयोजन करणे. यामध्ये पुणे, मुंबई, बंगळुरू, लखनौ, हैदराबाद, चेन्नई, दिल्ली, राजस्थान, गुजरात, गोवा, नागपूर, चंडीगड व जयपूर या प्रमुख शहरांचा समावेश असेल, जेथे हे तरुण आपली संगीताप्रतीची आकांक्षा पूर्ण करु शकतील.”
हे तीन गायक म्हणजे अक्षता संब्याल (वय १५), प्रशांत सिंग कलहंस (वय १७) व जसु खान मीर (वय १४)
अक्षता संब्याल : अक्षता ही बंगळुरुची रहिवासी असून ती ‘व्हॉईस इंडिया किड्स’ स्पर्धेतील स्पर्धक आहे. तिच्या नादमधुर आवाजाने याआधीच ‘गुंजाइश’ या लघुपटाद्वारे चित्रपट क्षेत्रात तरंग उमटवणे सुरू केले आहे. बॉलिवूडसाठी गायचे तिचे स्वप्न आहे.
प्रशांत सिंग कलहंस : प्रशांतने लोकप्रिय चित्रपटगीते दमदारपणे सादर करुन याआधीच आपले राहते शहर लखनौतील रसिकांचे मन जिंकले आहे. या होतकरु प्रतिभावान गायकालाही बॉलिवूडमध्ये पार्श्वगायन करण्याची आकांक्षा आहे.
जसु खान मीर : राजस्थानातील या बासरीप्रेमी किशोराने वयाच्या पाचव्या वर्षी संगीत शिकण्यास सुरवात केली असून ‘व्हॉइस इंडिया किड्स’ व ‘सा रे ग म प लिटिल चॅम्प्स’ या दोन्ही स्पर्धांत लोकप्रियता मिळवून भारतीय दूरचित्रवाणी जगतात याआधीच आपला ठसा उमटवला आहे.
पेहली गूंज या आल्बममध्ये मैत्री, प्रेम, इमानदारी व देशभक्ती अशा विविध भावभावनांचा आविष्कार घडवणारी गाणी आहेत. हे गीतलेखन ‘बाजीराव मस्तानी’, ‘मेरी कोम’, ‘रेस २’व अशा अनेक चित्रपटांचा प्रसिद्ध गीतकार प्रशांत इंगोले याने केले आहे. आल्बममधील पाच गाण्यांपैकी दोन गाण्यांचा व्हिडिओ आज सादर करण्यात आला. यातील ‘कुछ भी नही’ या गाण्याला श्रेयस पुराणिक याने संगीत दिले असून ‘यारा तेरी यारी’ या गाण्याला विक्रम माँट्रोज याने संगीत दिले आहे.
या आल्बमचा व्हिडिओ सादर करण्याची पुष्पगंगाची योजना असून तो लवकरच सर्व रेडिओ, टीव्ही व ऑनलाईन मीडियावर सादर केला जाईल.
या प्रतिभाशाली गायकांना मैफली आणि खासगी कार्यक्रमांत गाणी सादर करण्यास आमंत्रित केल्यास त्यांचे कौशल्य सर्व वयोगटांना भावेल. सध्या केवळ लोकप्रिय पार्श्वगायकांच्या कार्यक्रमांचे आयोजन करण्याचा प्रघात आहे, पण या गायकांना संधी देण्यासाठी प्रायोजक पुढे आले तर हे गायक नक्कीच हा प्रघात बदलतील.
‘स्वॅगलिव्ह’ ॲपचे सादरीकरण
अम्मुल पुढे म्हणाले, “आम्ही केवळ टीव्हीवरील तरुणांनाच निवडत नाही. भारतात खूप बुद्धिमान युवक आहेत, पण त्यांना कुणाशी संपर्क साधायचा, कुठे जायचे याबाबत काहीच ठाऊक नाही. त्यामुळे ते आपली स्वप्ने साकारु शकत नाहीत अथवा प्रसिद्धीच्या झोतात येऊ शकत नाहीत. यासाठीच आम्ही आता आमचे ‘स्वॅगलिव्ह’ हे ॲप सादर करत आहोत. हे ॲप म्हणजे ऑनलाईन व्हिडिओ शेअरिंग प्लॅटफॉर्म आहे, जेथे भारतातील प्रत्येकजण आपले बुद्धिकौशल्य प्रदर्शित करु शकेल. हे कौशल्य केवळ संगीतापुरते मर्यादित नसेल तर नकला, विनोद, नृत्य, आरजे, एमजे, व्हीजे अशा क्षेत्रांतील व सर्व वयोगटांसाठी असेल. यातून या कलाकारांना आघाडीच्या रिअलिटी शोंचा भाग बनण्याचीही संधी मिळेल व त्यांची ज्यासाठी खरोखर पात्रता आहे ते नाव व प्रसिदधीही मिळवू शकतील.”
हे ॲप पुढील महिन्यात सादर होण्यासाठी सज्ज आहे. हा संपूर्णपणे स्वदेशात विकसित झालेला सोशल व्हिडिओ/ऑडिओ/चॅटिंग प्लॅटफॉर्म आहे. तंत्रज्ञानाच्या मदतीने हा स्वॅगलिव्ह ॲप बनावट वापरकर्त्यांना वगळून या प्लॅटफॉर्मला विश्वसनीय व स्पर्धात्मक बनवेल.