पुणे–प्रसिद्ध अध्यात्मिक गुरू आणि साधू वासवानी मिशनचे संस्थापक दादा वासवानी यांच्यावर शासकीय इतमामात आज (दि. 13) अंत्यसंस्कार करण्यात आले. दुपारी 3 वाजता त्यांच्या अंतयात्रेला सुरुवात झाली होती. सायंकाळी 6.30 वाजता त्यांना मुखाग्नी देण्यात आला. सिंधी समाजाच्या पद्धतीने अंत्यसंस्कार करण्यात आले. यावेळी अनुयायांची मोठ्या प्रमाणात गर्दी झाली होती.
भाजपचे ज्येष्ठ नेते लालकृष्ण अडवाणी, माजी राष्ट्रपती प्रतिभा पाटील, शिक्षण मंत्री विनोद तावडे, पालकमंत्री गिरीश बापट, जिल्हाधिकारी नवल किशोर, सामाजिक न्यायमंत्री दिलीप कांबळे आदी मान्यवरांनी अंतदर्शन घेतले.
दादा वासवानी यांनी त्यांच्या संपूर्ण जीवनात मानवतेच्या कल्याणच्या दृष्टीने काम केले. जागतिक शांततेसाठी सातत्याने प्रयत्न केले. प्राणीमात्रांवर प्रेम करा असा संदेश दिला. समाजाला आवश्यक असलेले रुग्णालय, शाळा, महाविद्यालय या व्यवस्थेची उभारणी केली. दादांनी शिकवलेले एखादे काम जरी आमच्याकडून पूर्ण झाले तर खऱ्या अर्थाने ती त्यांना श्रद्धांजली असेल, अशी भावना अनुयायांनी व्यक्त केली.
2 ऑगस्ट रोजी त्यांच्या वयाची शताब्दी पूर्ण होणार होती. 2 ऑगस्ट 1918 रोजी दादा वासवानी यांचा जन्म झाला. त्यांच्या शताब्दी निमित्त साधू वासवानी मिशनतर्फे जय्यत तयारी सुरू करण्यात आली होती. मात्र, गुरुवारीच त्यांचे निधन झाल्याने अनुयायांमध्ये हळहळ व्यक्त केली जात आहे.