पुणे- आदर पूनावाला महाराष्ट्र टेनिस अकादमी(एपीएमटीए) व डेक्कन जिमखाना यांच्या संलग्नतेने आयोजित एमएसएलटीए योनेक्स सनराईज अखिल भारतीय मानांकन चॅम्पियनशिप सिरिज 14 वर्षाखालील टेनिस स्पर्धेत मुलांच्या गटात पुण्याच्या ईशान देगमवार, अलिना शेख या खेळाडूंनी आपापल्या प्रतिस्पर्ध्यांचा पराभव करून विजेतेपद संपादन केले.
डेक्कन जिमखाना क्लबच्या टेनिस कोर्टवर पार पडलेल्या या स्पर्धेत मुलांच्या गटात अंतिम फेरीत दुसऱ्या मानांकित ईशान देगमवार याने सहाव्या मानांकित आर्यन सुतारचा 3-6, 6-3, 6-1 असा तीन सेटमध्ये पराभव करून विजेतेपद पटकावले. सुमारे 2तास 15मिनिटे चाललेल्या या सामन्यात पहिल्या सेटमध्ये आर्यन याने वर्चस्व राखले व हा सेट ईशानविरुद्ध 6-3असा जिंकून आघाडी घेतली. पिछाडीवर असलेल्या ईशानने 2-1 अशी सामन्यात स्थिती असताना चौथ्या, सहाव्या गेममध्ये आर्यनची सर्व्हिस ब्रेक केली व स्वतःची सर्व्हिस राखत हा सेट 6-3 असा जिंकून सामन्यात बरोबरी साधली. तिसऱ्या सेटमध्ये ईशान याने अधिक भक्कम सुरुवात केली. या सेटमध्ये ईशानने आर्यनची पाचव्या गेममध्ये सर्व्हिस रोखली व हा सेट 6-1 असा जिंकून विजय मिळवला. ईशान हा व्हीकटोरीयस किड्स एज्युकेअरमध्ये नववी इयत्तेत शिकत असून इंटेसिटी टेनिस अकादमी येथे प्रशिक्षक अतुल देवधरे यांच्या मार्गदर्शनाखाली सराव करतो.
मुलींच्या गटात अंतिम फेरीत सहाव्या मानांकित अलिना शेख हिने प्रिशा जुनेजाचा 6-2, 6-1 असा सहज पराभव करून विजेतेपदाला गवसणी घातली. अलिना ही आठवी इयत्तेत उंड्री येथील बिशप्स शाळेत शिकत असून मॅसट्रो टेनिस अकादमीत प्रशिक्षक प्रणव वेलणकर यांच्या मार्गदर्शनाखाली सराव करते. तिचे हे या वर्षातील दुसरे विजेतेपद आहे.
स्पर्धेचे पारितोषिक वितरण माजी फेड कप टेनिसपटू राधिका तुळपुळे-कानिटकर आणि सध्याची अव्वल भारतीय महिला टेनिसपटू प्रांजला येडलापल्ली यांच्या हस्ते करण्यात आले. यावेळी एपीएमटीएचे आदित्य मडकेकर, एआयटीए सुपरवायझर तेजल कुलकर्णी आणि अजय कामत आदी मान्यवर उपस्थित होते.
स्पर्धेचा सविस्तर निकाल: उपांत्य फेरी: मुली:
अलिना शेख(6)वि.वि.संचिता नगरकर(3)9-7;
प्रिशा जुनेजा वि.वि.कनिका बाबर 9-2;
अंतिम फेरी: अलिना शेख(6)वि.वि. प्रिशा जुनेजा 6-2, 6-1;
मुले: उपांत्य फेरी:
आर्यन सुतार(6)वि.वि.सुधांशू सावंत(7)9-6;
ईशान देगमवार(2)वि.वि.प्रथमेश पाटील(8)9-1;
अंतिम फेरी: ईशान देगमवार(2)वि.वि. आर्यन सुतार(6) 3-6, 6-3, 6-1.