परभणी– काँग्रेसचे राधाकृष्ण विखे पाटील यांचे सुपूत्र सुजय विखे पाटील आणि राष्ट्रवादीच्या विजयसिंह मोहिते-पाटील यांचे चिरंजीव रणजीतसिंह मोहिते-पाटील यांच्यानंतर आणखी एका राष्ट्रवादीच्या नेत्याचा मुलगा भाजपच्या गळाला सापडला आहे. राष्ट्रवादीचे माजी खासदार गणेश दुधगावकर यांचे चिरंजीव समीर दुधगावकर भाजपमध्ये प्रवेश करणार आहेत.
समीर दुधगावकर यांनी आज मुख्यमंत्री देवेंद्र फडणवीस यांची भेट घेतली. या प्रवेशामुळे पाटील पुत्रांनंतर दुधगावकरांमुळे आणखी एक धक्का राष्ट्रवादीला बसला आहे. समीर दुधगावकर यांनी देवेंद्र फडणवीस, शिक्षणमंत्री विनोद तावडे आणि भाजप प्रदेशाध्यक्ष रावसाहेब दानवे यांची भेट घेऊन भाजप प्रवेश निश्चित केला.
समीर यांनी अमेरिकेतून शिक्षण पूर्ण करून भारतात परतल्यानंतर महाराष्ट्र चेंबर्स ऑफ कॉमर्सच्या माध्यामातून उद्योग क्षेत्रात कार्य सुरू केले. गेल्या अनेक दिवसांपासून ते आपल्या वडिलांना निवडणूक प्रचारात मदत करत आहेत.
गणेश दुधगावकर यांनी राष्ट्रवादीत प्रवेश केल्यानंतर त्यांना उमेदवारी मिळेल अशी आशा होता, पण मागच्या वेळी राष्ट्रवादीकडून विजय भांबळे यांना उमेदवारी देण्यात आली. यावेळेसही दुधगावकरांना डावलून राजेश विटेकर यांना लोगसभेची उमेदवारी दिली, त्यामुळेच हा भाजप प्रवेश झाला असल्याचे सांगितले जात आहे.
रणजीतसिंह आणि सुजय यांनी भाजपात प्रवेश केला,पण त्यांच्या वडिलांनी आपला पक्ष सोडला नाही. त्यामुळे आता गणेश दुधगावकर राष्ट्रवादी सोडणार का नाही, तसेच जर भाजपने समीर यांना परभणीतून उमेदवारी दिली तर परभणीत शिवसेनेचे विद्यमान खासदार संजय उर्फ बंडू जाधव यांचा पत्ता कट होणार का याकडे सर्वांचे लक्ष लागून आहे.