वाचनाची आवड तशी लहानपणापासूनच. आजोबा आणि काकाला वाचनाची आवड. वर्तमानपत्रातील चांगल्या आणि वाचनीय लेखांची कात्रणं दोघही काढून ठेवत असत आणि कात्रणाची एक फाईलही होती त्यांची. मी आणि माझा भाऊ आम्ही दोघेही शाळेत असल्यापासूनच गणेश लायब्ररीचे सभासद होतो. पुस्तकाचे नाव, लेखकाचे नाव आणि पुस्तक वाचल्याची तारीख यांची नोंद आम्ही दोन्ही भावंडं एका वहीत करीत असू.
पुस्तकं वाचता-वाचता बऱ्याच गोष्टी हळूहळू लक्षात यायला लागल्या. प्रत्येक लेखकाची भाषाशैली वेगळी. पु. ल. देशपांडे विनोदी कथा लिहितात तर वपुंच्या कथा ह्या सर्वसामान्य माणसांच्या अंतरंगाचा वेध घेतात. शब्दांचा खेळ इथे अनुभवायला मिळतो. त्यांच्या लेखनात एक वेगळा विचार, दृष्टिकोन असतो. गो.नी. दांडेकरांच्या कादंबरीत, ऐतिहासिक घटना गोष्टीरूपाने सांगण्याचा प्रयत्न असतो; तर विश्वास पाटलांचा ऐतिहासिक प्रसंग भव्य आणि उत्कट पध्दतीने मांडण्याकडे कल असतो. कुसुम अभ्यंकर, सुमती क्षेत्रमाडे, कुमुदिनी रांगणेकर या लेखिका कौटुंबिक जिव्हाळ्याच्या कथा सांगतात. तर अद्भुत रहस्यमय गोष्टी डॉ. सुरेशचंद्र नाडकर्णी यांच्या कथांमधून अनुभवायला मिळतात. सुधा मूर्ती आपल्याला आलेले अनुभव साध्या सोप्या भाषेतून सांगताना विचार करायचा एक दृष्टिकोन देतात…
वि.स.खांडेकरांची ‘उल्का’ कादंबरी शाळेत असताना मैत्रिणींसोबत अगदी झपाटल्यागत वाचली होती. कधी एकदाची मधली सुट्टी होतेय आणि कादंबरी वाचतोय, असं आम्हाला झालेलं असायचं. ‘उल्का’च्या आम्ही प्रेमातच पडलो होतो. कादंबरी आपल्या संग्रही असावी असं वाटायचं, पण ती खूप जुनी असल्यामुळे पुस्तकाच्या दुकानात उपलब्ध नव्हती. जुन्या पुस्तकांचं ‘माहेरघर’ म्हणजे रद्दीवाला! असंच एकदा पुस्तके चाळता-चाळता हाती आली ती ‘उल्का’…जिचा शोध मी बरीच वर्षे घेत होते. रद्दीवाल्याकडे ती कादंबरी सापडली या आनंदापेक्षा मला रुखरुख वाटली ती एवढ्या मोठ्या लेखकाची कांदबरी रद्दीत सापडावी…असो.
‘(वाचनाची)इच्छा असेल तर मार्ग सापडतो’ याचा प्रत्यय मला चिंचपाडा अंगणवाडीत (नॅशनल पार्क, बोरिवली) आला. तिथल्या मुलांनी आपली वाचनाची आवड जोपासली आहे. एक ट्रंकेत नाना प्रकारची पुस्तकं ठेवली आहेत आणि त्या सर्व पुस्तकांची नोंदवहीही आहे. वाचता-वाचता या मुलांचं ‘बालपण’ समृद्ध होतंय!
वपु आणि सुधा मूर्ती यांच्या लेखनाचा माझ्यावर प्रभाव जास्त होता. मलाही हळूहळू प्रसंग आणि व्यक्तिचित्र लिहिण्याची सवय लागली आणि मी लिहिती झाले. वाचता-वाचता या अशा आणि अनेक गोष्टी अनुभवायला आणि त्यातून खूप काही शिकायलाही मिळाले.
तुम्हालाही असाच अनुभव आला असेल वाचता…वाचता…
पूर्णिमा नार्वेकर
पुष्पक अपार्टमेंट, ब्लॉक नं 203,
भिकाजी लाड मार्ग,
दहिसर फाटक जवळ,
दहिसर (प.),
मुंबई – 400068