‘नही नही, वो प्लास्टिक के पिशवी मे भाजी मत दो. मेरे पास हे कॉटन की कॅरी बॅग…’ एका खांद्याला पर्स, दुसऱ्या खांद्याला एक कॉटनची भरलेली पिशवी आणि हातात कॉटनचीच भाजीची पिशवी हे सगळं सांभाळण्याची तारेवरची कसरत करत या बाई भाजीवाल्याला सूचना देत होत्या.
कॅरी बॅग – माझ्याकडे रोज आता कॉटनची कॅरी बॅग असतेच, हे वाक्य बऱ्याच वेळा सार्वजनिक ठिकाणी कुणा ना कुणाकडून ऐकायला मिळतं. भाजीपाला, फळं, किराणा सामान इत्यादी सर्व काही कॅरी करणारी कॅरी बॅग. ‘कॅरी’ हा सुटसुटीत आणि छान शब्द. हा शब्द फक्त ‘कॅरी बॅग’ पुरताच मर्यादित नाही तर व्यवहारात तो बऱ्याच ठिकाणी सर्रास वापरला जातो. शाळेत जाताना डब्याची बॅग करी करणे, ऑफिस जाताना फाईल कॅरी करणे, पिकनिकला जाताना कोण कोण, काय काय नाश्ता आणि उपयोगी वस्तू कॅरी करताहेत यावर चर्चा, वगैरे.
लांबच्या प्रवासाला जातानाही नातेवाईक-मित्रमंडळी बरोबर काय काय कॅरी करायला हवे, त्याची भलीमोठी लांबलचक लिस्ट देतात आणि वर एक सल्लाही देतात-जेवढं झेपेल तेवढंच कॅरी करा हां…गंमतच आहे!
मे महिन्याच्या सुट्टीत गावी जाणाऱ्या मुंबैकर गाड्यांच्या कॅरिअरवर किती वस्तू असतात…सायकल, भांड्याचा रॅक आणि येताना त्याच कॅरिअरवर आंब्याच्या पेट्या, फणस , नारळ व सोबत कॅरी केलेल्या गावच्या आठवणी…मातीचा गंध…
तसेच ‘कॅरी ऑन’ हा शब्दही नेहमीच आपण ऐकतो की. नवीन कपडे घातले की तेही चांगल्या प्रकारे कॅरी करता (म्हणजे सांभाळता) आले पाहिजेत. नुकताच एका लग्नातला प्रसंग- एक युवती छान डिझाईनर लॉन्ग पायघोळ ड्रेस घालून आली होती, त्यावर तितक्याच लांबीची ओढणी, त्यात हाय हिल्स…चालताना तिची अक्षरशः त्रेधातिरपीट उडत होती…नक्की काय काय सांभाळू. आपण जो काही ड्रेस घातला आहे तो चांगल्या प्रकारे कॅरीही करता आला पाहिजे – आजूबाजूला कुजबूज ऐकायला आली. खरंच आहे म्हणा…भरजरी ड्रेस आणि भडक मेकअप केला म्हणजे आपण खूप सुंदर दिसतो, असं नाही ना? त्यापेक्षा आपल्याला सांभाळता येईल, ज्यात आपण कम्फर्टेबल असू, जे कॅरी करणं सोपं जाईल, असा वेष परिधान करूनही आपण ग्रेसफुल दिसू शकतो.
कॅरी… काय काय आपण कॅरी करतो? फक्त कॉटनची पिशवीच, फाईल, डबा… नाही तर रोज आपण सगळेच बरोबर काही ना काहीतरी कॅरी करतोच की. खूप काही…टेन्शन, भीती, सुखदुःख, घरातले व्याप, ऑफिसची कामं…त्या कॅरी बॅगेसारखं कॅरी करतो…सर्व काही.
पूर्णिमा नार्वेकर
पुष्पक अपार्टमेंट, ब्लॉक नं 203,
भिकाजी लाड मार्ग,
दहिसर फाटक जवळ,
दहिसर (प.),
मुंबई – 400068