पुणे : ज्यांना भाजपकुमार असे संबोधिले जात, त्या पुणे महापालिकेचे आयुक्त कुणाल कुमार यांची अखेर केंद्रात नियुक्ती करण्याचा आदेश आज जारी झाल्याचे वृत्त आहे . केंद्रात गृहनिर्माण विभागाच्या सहसचिव पदी त्यांची नियुक्ती करण्यात आली आहे. आबा बागुल,अरविंद शिंदे, चेतन तुपे पाटील या सारख्या कॉंग्रेस- राष्ट्रवादी नेत्यांनी या भाजप कुमार यांची बदली केंद्रात चांगल्या ठिकाणी होईल असे संकेत वारंवार त्यांच्यावर टीका करताना महापालिकेच्या मुख्य सभेत दिले होते, त्याची प्रचीती या आदेशाने आज येते आहे .
भाजप कुमार हे तब्बल पावणे चार वर्षे पुण्याचे आयुक्त होते. त्यांनी आधीच्या टप्प्यांत कॉंग्रेस-राष्ट्रवादीच्या नेत्यांचा विश्वास संपादन केला. नंतर सत्तेवर आलेल्या भाजपच्या नेत्यांनाही त्यांनी आपलेसे केले. परिणामी त्यांचा कार्यकाल विनासायास पार पडला. पुण्याला चोवीस तास पाणीपुरवठा करण्यासाठीचे टेंडर त्यांच्याच कालावधीत निघाले. यासाठी खुल्या बाजारातून पुणे महापालिकेने दोनशे कोटी रूपये हे खुल्या बाजारातून उभे केले. देशातील हा पहिलाच प्रयोग ठरला होता. ही निविदा जादा दराने वादात अडकली खरी. मात्र त्यातूनही भाजप कुमार यांनी मार्ग काढला. अनुभवी व प्रधान सचिव दर्जाचा अधिकारी पुणे पालिकेवर नेमला जातो. मुख्यमंत्री देवेंद्र फडणवीस यांच्या विश्वासातील अधिकारी मानले जातात तेच येथे येतील असे दिसते आहे