पुणे-पुणे फेस्टिवलमध्ये जेष्ठ भरतनाट्यम नृत्यांगना डॉ.शशिकला रवी यांनी बालगंधर्व
रंगमंदिर येथे ‘देवी पार्वती’ कार्यक्रम सादर करून रसिक प्रेक्षकांना मंत्रमुग्ध केले. या कार्यक्रमात
देवी पार्वतीची विविध रूपे त्यांनी नृत्य विश्काराच्या आधारे सादर केली. त्यामध्ये हिमालयाची
मुलगी देवी पार्वती, शिवाची आराधना करणारी देवी पार्वती, शिवाची पत्नी देवी पार्वती, गणेशाची
आई देवी पार्वती, महिषासुराचा वध करणारी देवी पार्वती, आदिशक्ती देवी पार्वती या बरोबरच
अर्धनारेश्वरी असणारी देवी पार्वती ही विविध रूपे डॉ. शशिकला रवी यांनी भरतनाट्यम नृत्यांच्या
आधारे प्रेक्षकांसमोर सादर केली. त्यांच्या या कलाकृतीला प्रेक्षकांनी भरघोस प्रतिसाद दिला. देवी
पार्वती ही हिंदू पुराणांमध्ये सर्वात प्रभावी व प्रबळ मानली जाते. तिची ही विविध रूपे साकारताना
डॉ. शशिकला रवी यांचे नृत्यचापल्य विलक्षण होते.
या कार्यक्रमास पुणे फेस्टिवलचे अध्यक्ष सुरेश कलमाडी, मुख्य संयोजक कृष्णकांत कुदळे,
सांस्कृतिक कार्यक्रम प्रमुख मोहन टिल्लू उपस्थित होते. नंदिता कलमाडी यांच्या हस्ते डॉ.
शशिकला रवी यांचा सत्कार करण्यात आला. पुणे फेस्टिवलचे बालगंधर्व रंगमंदिर प्रमुख श्रीकांत
कांबळे यांनी आभारप्रदर्शन केले. या कार्यक्रमाचे सिंहगड इन्सटीट्युट व सुमा शिल्प लि. हे
प्रायोजक होते.