पुणे- तब्बल ३० वर्षे एकाच पक्षातून सातत्याने नगरसेवक म्हणून समाधानकारक काम करणारे माजी उपमहापौर आबा बागुल आता येत्या २०१९ मध्ये तरी आमदार होणार काय? पक्ष त्यांना न्याय देणार काय ? अन्य पक्षीय त्यांचेबाबत काय भूमिका घेतील ?जनता आमदारकीसाठी त्यांच्या पाठीशी राहील काय ? अशा सर्व प्रश्नांवर आता खल सुरु होत आहे .
त्यास कारण ही तसे जाहीर घडले आहे. आज दुपारी आबा बागुल यांच्या प्रभागातील थ्री डी तारांगण चे उद्घाटनप्रसंगी आबा यांच्या आमदारकीसाठी व्यासपीठावरून काही वक्तव्ये झडली आहेत . अर्थात हि वक्तव्ये जरी हसत खेळत केली गेली असली तरी राजकारणात या वक्तव्यांना कसे महत्व आहे हे येत्या २०१९ च्या निवडणुकीत दिसणार आहे . या कार्यक्रमास शरद पवार खुद्द येवू शकले नाहीत पण विशेष म्हणजे त्यांनी आपले अर्धा तासाचे भाषण व्हिडीओ रेकोर्ड करून येथे पाठविले. पवार यांनी आपल्या भाषणात आबा बागुल यांच्या कामाचे कौतुक केले आहे .
आबा बागुल यांच्या संकल्पनेतून पुणे महानगरपालिकेतर्फे स्व .विलासराव देशमुख थ्री-डी तारांगणाच्या उदघाटन सोहळ्याचे आयोजन करण्यात आले, त्यावेळी केंद्रीय कृषिमंत्री, माजी मुख्यमंत्री शरद पवार यांची ध्वनीचित्रफीत उदघाटन सोहळ्या प्रसंगी दाखविण्यात आली. यावेळी महापौर मुक्ता टिळक ,माजी मुख्यमंत्री पृथ्वीराज चव्हाण, पालकमंत्री गिरीश बापट, माजी मुख्यमंत्री आणि शिवसेनेचे ज्येष्ठ नेते मनोहर जोशी, खासदार सुप्रिया सुळे, कॉंग्रेसचे शहराध्यक्ष रमेश बागवे ,माजीमंत्री हर्षवर्धन पाटील, आमदार अमित देशमुख, खासदार वंदना चव्हाण, राष्ट्रवादीचे जेष्ठ नेते अंकुश काकडे, कॉंग्रेसचे जेष्ठ नेते उल्हास पवार,मोहन जोशी तसेच नगरसेवक महेश वाबळे ,राजेंद्र शिळीमकर ,मंजुषा खर्डेकर, पालिका आयुक्त सौरव राव उपस्थित होते.
आबा यांनी माजी मुख्यमंत्री पृथ्वीराज चव्हाण यांच्याकडे , आपण माझ्यावर कायम असेच प्रेम राहू द्यावे आणि २०१९ च्या निवडणुकीत मला आमदार करावे ..अशी थेट मागणी केली . पृथ्वीराज चव्हाण यांनी आपल्या भाषणातून आबा यांच्या कामाचे कौतुक केले पण आबा यांच्या या मागणीबाबत चाकर शब्द काढला नाही . पण हा धागा पकडून भाजपचे आमदार आणि पालकमंत्री यांनी मात्र आबा बागुल यांच्या कामाचे कौतुक करत ३० वर्षे नगरसेवक आहात ,पुढे ही अजून ३०वर्षे नगरसेवकच रहा असे वक्तव्य केले ..तर आमदार अमित विलासराव देशमुख यांनी आपण तुम्ही आमदार व्हावे म्हणून प्रार्थना करू असे सांगितले आणि पालकमंत्री , तसेच राष्ट्रवादीचे उपस्थित नेते यांचे नाव घेत या सर्वांनी चांगल्या कार्यकर्त्याला पुढे नेण्याचे ठरविले तर आबा तुमची मनोकामना पूर्ण होण्यास काही अडथला येणार नाही असे वक्तव्य केले.
आबा बागुलांच्या आमदारकीच्या कामनेविषयी व्यासपीठावर झालेली वक्तव्ये पहा जशीच्या तसी ….