पुणे – मराठी भाषा संवर्धनासाठी एक ते 15 जानेवारीदरम्यान मराठी भाषा पंधरवडा दिन साजरा करण्याचा निर्णय मराठी भाषा संवर्धन समितीच्या शुक्रवारी झालेल्या बैठकीत घेण्यात आला. महापौर मुक्ता टिळक यांनी शुक्रवारी पत्रकार परिषदेत ही माहिती दिली.
या पंधरवड्यात प्रकाशकांना साहित्य पुरस्कार देण्याचा निर्णय या बैठकीत घेण्यात आला. तसेच नवीन साहित्याकट्टे व्हावेत, यासाठी प्रयत्न करणार असल्याचे टिळक म्हणाल्या. याशिवाय येत्या 22 डिसेंबरपासून दुपारी 12 ते 12.10 या कालावधीत आकाशवाणीवर ‘आपली मराठी’ या अंतर्गत कार्यक्रम साजरा करण्यात येणार आहे. हा कार्यक्रम आठवड्यातून एकदा घेतला जाईल. आकाशवाणी आणि महापालिका यांच्या संयुक्त विद्यमाने महापालिकेच्या प्रायोजकत्त्वातून हा कार्यक्रम होणार असल्याचे टिळक यांनी नमूद केले.
मराठी भाषा संवर्धन समितीला पूर्णवेळ कार्यालय सद्यस्थितीत नाही. त्यामुळे समितीला पूर्णवेळ कार्यालय निर्मितीची प्रक्रिया सुरू असल्याचे टिळक यांनी नमूद केले. याशिवाय महापालिका शाळातील विद्यार्थ्यांमध्ये मराठी भाषा आणि साहित्याविषयीची गोडी निर्माण व्हावी यासाठी पहिली ते नववीच्या विद्यार्थ्यांना एक जानेवारीपासून “लेखक तुमच्या भेटीला’ हा उपक्रम सुरू करण्यात येणार असल्याचेही टिळक यांनी सांगितले. या उपक्रमांतर्गत बालनाट्येही दाखवली जाणार असल्याचे टिळक यांनी सांगितले.