सुभाष जगतापांवर पोलिसी कारवाई चे मुख्य सभेत पडसाद ..
पुणे-भाजपच सत्तेच्या काळात विरोधीपक्षाच्या लोकप्रतिनिधींवर पोलिसी दंडुकेशाहीच्या कारवाया होत असल्याचा आरोप आज विरोधी पक्ष नेते दिलीप बराटे यांनी येथे केला तळजाई टेकडीवरील हिरवाई नष्ट करून विकासाच्या नावाखाली तेथे सुरू असलेल्या काँक्रिटीकरणाच्या कामावरून पालिकेतील सदस्यांनी मंगळवारी प्रशासनाला मुख्यसभेत धारेवर धरले. या कामाला विरोध करणाऱ्या नगरसेवकाविरोधात गुन्हा दाखल केल्याने त्याबाबत तीव्र नापसंती व्यक्त करण्यात आली. अखेर, या प्रभागातील सर्व लोकप्रतिनिधींना विश्वासात घेऊन, त्यांच्या सहमतीनेच काम केले जावे, असे स्पष्ट आदेश महापौर मुक्ता टिळक यांनी प्रशासनाला दिले.
तळजाई टेकडीवर वनोद्यान साकारण्यासाठी पालिकेने तयार केलेल्या आराखड्यानुसार सध्या अनेक ठिकाणी कामे सुरू आहेत. त्या अंतर्गत काही भागांत निर्माण केल्या जाणाऱ्या वाहनतळाच्या कामामुळे तळजाईवरील अनेक झाडे तोडण्यात आली आहेत, तर बऱ्याच ठिकाणी सिमेंट काँक्रिटचा वापर करून डोंगरावरील जैवविविधता नष्ट केली जात असल्याचा आरोप करून, राष्ट्रवादी काँग्रेसच्या नगरसेविका अश्विनी कदम यांनी हा विषय सर्वसाधारण सभेत उपस्थित केला. या कामाला विरोध केला; म्हणून लोकप्रतिनिधींविरोधात थेट गुन्हा दाखल करण्याचे कारण काय, अशी विचारणा त्यांनी केली. काही ठरावीक व्यक्तींच्या आग्रहामुळेच तळजाईच्या डोंगराचे काँक्रिटीकरण करण्याचा घाट घातला जात असल्याची टीका त्यांनी केली.
महापालिकेतील विरोधी पक्षनेते दिलीप बराटे यांनीही प्रशासनाच्या कार्यपद्धतीवर ताशेरे ओढले. गेल्या अनेक वर्षांपासून तळजाईची जागा महापालिकेच्या ताब्यात मिळावी, यासाठी सुभाष जगताप यांनी प्रयत्न केले. त्यांच्या प्रयत्नांमुळे तळजाई टेकडी अजून हिरवीगार राहिली आहे; पण त्यांच्यावरच गुन्हा दाखल करण्याचा प्रकल्प अत्यंत निंदनीय असून, याबाबत तातडीने खुलासा करण्याची मागणी बराटे यांनी केली.
तळजाईचा विकास आराखडा तयार करण्यात आला असून, त्यानुसार केवळ वाहनतळासाठी शेड उभारण्याची कामे काही ठिकाणी सुरू असल्याचा खुलासा महापालिका आयुक्त सौरभ राव यांनी केला. या ठिकाणी मारहाणीचा प्रकार झाल्याने गुन्हा दाखल करण्यात आल्याचे स्पष्टीकरण त्यांनी दिले.
तळजाई येथे होणाऱ्या कामाची कोणतीही पूर्वकल्पना अथवा माहिती प्रभागातील स्थानिक नगरसेवकांना देण्यात आली नाही. नागरिकांकडून त्याबाबत सातत्याने विचारणा केली जात होती; पण त्यावर कोणतेही उत्तर देता येत नव्हते. त्यामुळे सर्व सदस्यांना योग्य स्वरूपात माहिती देण्याची मागणी करण्यात आली. त्यावर प्रभागातील सर्व सदस्यांसह स्वीकृत सदस्यांना तळजाईवरील प्रकल्पाची सविस्तर माहिती देण्यात यावी आणि त्यांच्या सूचना/कल्पना यांचा अंतर्भाव प्रकल्पात केला जावा, असे आदेश महापौरांनी दिले.
https://www.facebook.com/MyMarathiNews/videos/313501776239129/