नवी दिल्ली: ‘मिशन शक्ती’ यशस्वी झाल्यानंतर काँग्रेस अध्यक्ष राहुल गांधी यांनी DRDOचे अभिनंदन केले आहे. तुमच्या कामाचा आम्हाला अभिमान आहे असं ट्विट राहुल गांधी यांनी केले आहे पण सोबतच त्यांनी पंतप्रधान नरेंद्र मोदींना जागतिक रंगभूमी दिनाच्या खोचकपणे शुभेच्छाही दिल्या आहेत. सध्या सोशल मिडियावर राहुल गांधी यांचे हे ट्विट चांगलेच चर्चेचा विषय ठरले आहे.
पंतप्रधान मोदी हे जाहिरातबाजी करण्यात कायम पुढे असतात असा आरोप काँग्रेसकडून वारंवार करण्यात येत असतो. तोच रोख ठेवत राहुल गांधी यांनी पंतप्रधानांवर ही खोचक टीका केली आहे. आज जागतिक रंगभूमी दिन आहे. पंतप्रधान हे सारखंच काहीतरी ड्रामेबाजी करत असतात असा संदेश तर राहुल गांधी यांना या ट्विटमधून द्यायचा नाही ना? अशी चर्चा सध्या सोशल मिडियावर होताना दिसत आहे.
दरम्यान, भारताने आज आपले नाव अंतराळात मोठे नाव केले आहे. अमेरिका, रशिया आणि चीन या देशांनाच आतापर्यंत ही कामगिरी करता आली आहे. भारत हा चौथा देश आहे. प्रत्येक भारतीयासाठी हा मोठा गर्वाचा क्षण आहे. एलईओ या उपग्रहाला आपल्या शास्त्रज्ञांनी ऩष्ट केले आहे. फक्त तीन मिनिटांत शास्त्रज्ञांनी ही कामगिरी केली आहे, याबाबत राहुल गांधी यांनी DRDO चे अभिनंदन केले आहे.