व्यापाऱ्यांनी दूत बनावं महापालिका व पोलीस प्रशासनाची अपेक्षा
पुणे : व्यापारी हा सर्वसामान्य जनतेच्या अगदी जवळ असतो. त्यामुळे महापालिकेतर्फे सुरु असलेल्या स्वच्छता मोहिम व अन्य योजनांच्या अंमलबजावणीत आणि पोलिसांकडून सुरू असलेल्या गुन्ह्यांच्या तपासणीत दूत म्हणून भूमिका बजावावी, अशी अपेक्षा महापालिका व पोलीस अधिकाऱ्यांनी व्यक्त केली.
पुणे जिल्हा रिटेल व्यापारी संघातर्फे आज कर्वेनगर येथील प्रतिज्ञा सभागृहात व्यापारी मेळाव्याचे आयोजन करण्यात आले होते. यावेळी पोलीस उपायुक्त पौर्णिमा गायकवाड, महापालिका उपायुक्त माधव जगताप, घाडगे, आरोग्य निरीक्षक सुहास पांढरे, पुणे जिल्हा रिटेल व्यापारी संघाचे अध्यक्ष सचिन निवंगुणे, मांगिलाल चौधरी, नेणाराम चौधरी, सोमाराम राठोड, रामभाऊ दोडके, अजित चंगेडिया, सुनील गेहलोत, उमेश यादव, भंवर चौधरी आदी मान्यवर उपस्थित होते.
पोलीस उपायुक्त पौर्णिमा गायकवाड यावेळी बोलताना म्हणाल्या की, व्यापारी संघातर्फे आयोजित या कार्यक्रमामुळे व्यापाऱ्यांपर्यंत पोलिसांकडून सुरू असलेले उपक्रम पोहोचवित आले. आणि व्यापारी हा सर्वसामान्य जनतेच्या अगदी जवळ असतो. त्यामुळे पोलिसांना ते अधिक चांगले आहे. व्यापाऱ्यांचेही प्रश्न पोलीस सोडवतील व त्यांना सहकार्य करतील.
पुणे महापालिकेतर्फे स्वच्छता मोहीम सुरू केली आहे. यामध्ये व्यापारी महत्वाची भूमिका बजावू शकतो. व्यापाऱ्यांनी या मोहिमेचा दूत बनून काम करण्याची आवश्यकता आहे, असे उपायुक्त माधव जगताप, घाडगे व आरोग्य निरीक्षक सुहास पांढरे यांनी सांगितले.
व्यापारी हा नेहमीच प्रशासनाला सहकार्य करतो व यापुढेही सर्व चांगल्या योजनेत व्यापारी सहभागी होईल. परंतु अशावेळी व्यापाऱ्यांवर चुकीच्या कारवाया होऊ नयेत. तसेच, दमदाटी करणारे, जबरदस्तीने वर्गणी मागणारे यांच्यावर कारवाई व्हावी, अशी मागणी सचिन निवंगुणे यांनी केली.