पुणे : माढा लोकसभा मतदारसंघातून विजयसिंह मोहिते पाटील यांना राष्ट्रवादी काँग्रेसकडून उमेदवार निश्चित केली होती. मात्र, त्यांचा आग्रह दुसऱ्या व्यक्तीला उमेदवारी देण्याचा होता. त्या व्यक्तीच्या उमेदवारीला माळशिरस मतदारसंघ वगळता इतर पाच विधानसभा मतदारसंघातून विरोध होता. त्यानंतरही आम्ही विजयसिंह मोहिते पाटलांशी संपर्क करण्याचा प्रयत्न केला, मात्र, त्यांनी आपला मोबाईल बंद ठेवून निर्णय घेतला, असे स्पष्टीकरण राष्ट्रवादीचे नेते अजित पवार यांनी दिले. हे स्पष्टीकरण देताना अजित पवार यांनी रणजितसिंह मोहिते पाटलांचे नाव घेणे टाळले.
अजित पवार यांच्या उपस्थितीमध्ये पुण्यात आयोजित केलेल्या कार्यकर्ता मेळाव्यात ते बोलत होते. मार्केटयार्ड परिसरातील निसर्ग मंगल कार्यालय येथे झालेल्या या मेळाव्यास राष्ट्रवादीच्या राज्यसभा सदस्या खा. अॅड. वंदना चव्हाण, शहराध्यक्ष चेतन तुपे, आमदार अॅड. जयदेवराव गायकवाड, पालिकेतील विरोधी पक्षनेते दिलीप बराटे, माजी आमदार बापू पठारे यांच्यासह पक्षाचे नगरसेवक व पदाधिकारी उपस्थित होते.