पुणे-भाजपचे सहयोगी अशी ओळख निर्माण झालेले राजसभेतील अपक्ष खासदार संजय काकडे यांनी आज काँग्रेसमध्ये प्रवेश करणार असल्याची जाहीर घोषणा केली.कॉंग्रेस चे अध्यक्ष राहुल गांधी देतील ती जबाबदारी आपण पार पाडू ,मला कोणताही शब्द देण्यात आलेला नाही पण जर कॉंग्रेसने मला उमेदवारी दिली तर समोर कोणीही येवू द्यात ,मला काही फरक पडत नाही असे आव्हान हि यावेळी काकडे यांनी पुण्याचे पालकमंत्री बापट यांच्यासह अन्य विरोधी उमेदवारांना दिले आहे .
काल सकाळी ‘मायमराठी’ ने काकडे यांना कॉंग्रेसची उमेदवारी देण्याबाबत दिल्ली दरबारी विचार झाल्याचे वृत्त दिल्यानंतर पुण्याच्या राजकीय वर्तुळात मोठी खळबळ उडाली .या पार्श्वभूमीवर ,आज माध्यमांनी त्यांची भेट घेतली असता ते बोलत होते , ते म्हणाले ‘काँग्रेस पक्षाबद्दल माझी आधीपासूनच सकारात्मक भूमिका होती. या पक्षाच्या एकाच कुटुंबातील ३ व्यक्तींनी देशासाठी बलिदान दिले आहे. काँग्रेस हा त्यागातून तयार झालेला पक्ष आहे. हा पक्ष सर्व जातीधर्मांना सोबत घेऊन चालतो. त्यामुळे काँग्रेसमध्ये प्रवेश घेण्याचा मी निर्णय घेतला आहे. त्यासाठी मी काही दिवसांपासून दिल्लीत होतो. मी अनेक काँग्रेस नेत्यांचीही भेट घेतली आहे. अजून मी पक्षात प्रवेश घेतला नसला तरी लवकरच अधिकृत पक्षप्रवेश करणार आहे, असे काकडे यांनी पत्रकारांशी बोलताना सांगितले
दरम्यान, आगामी काळात पक्षश्रेष्ठी जो आदेश देईल तो मला मान्य आहे. लोकसभेसाठी काँग्रेसकडून विचारणा झाल्यास समोर कोण असेल याचा मला फरक पडत नाही, असे सांगत त्यांनी गिरीश बापट यांना अप्रत्यक्ष आव्हान दिले.
काँग्रेस पक्षामध्ये प्रवेश करण्यापुर्वी भाजपच्या नेत्यांसोबत चर्चा झाली का? किंवा मुख्यमंत्र्यांबद्दल काय भूमिका आहे असे विचारले असता, मुख्यमंत्र्यांशी वैयक्तीक मतभेद नाहीत. मी पक्ष सोडला असला तरी आमची मैत्री कायम राहील, अशी प्रतिक्रिया त्यांनी दिली.