पुणे- विश्वगान सम्राज्ञी भारतरत्न श्रीमती लता मंगेशकरजी यांच्या ९१ व्या वाढदिवसाचे औचित्य साधून व त्यांनी आयुष्यभर केलेल्या अलौकिक अशा संगीत साधनेचा व संगीत सेवेचा उचित गौरव म्हणून त्यांच्या नावाने, माईर्स एमआयटीच्या विश्वशांती संगीत कला अकादमीतर्फे ‘विश्वगान सम्राज्ञी भारतरत्न श्रीमती लता मंगेशकर विश्वशांती संगीत अध्यासना’ची स्थापना करण्यात आल्याचे आज संस्थेद्वारे जाहीर करण्यात आले.
संगीताच्या साधनेतून ईश्वरदर्शन व शांतरसाची अनुभूती देणार्या भारतीय शास्त्रीय व सुगम संगीताचा प्रचार व प्रसार संपूर्ण जगभर व्हावा, या उद्देशाने सदरील अध्यासनाची स्थापना करण्यात आली आहे. या अध्यासना अंतर्गत संगीताच्या क्षेत्रात शिक्षण घेणार्या गरीब, होतकरू, गुणवंत तसेच संशोधन करणारे एक विद्यार्थी व एक विद्यार्थिनी यांना शिष्यवृत्ती जाहीर करण्यात आली आहे.
आदरणीय भारतरत्न श्रीमती लता मंगेशकर या विश्वशांती संगीत कला अकादमीच्या स्थापनेपासून अध्यक्ष असून त्यांचे बहुमोल मार्गदर्शन संस्थेला सतत लाभत आले आहे. भारतीय संगीत सृष्टी सर्वार्थाने समृध्द करणार्या लतादीदी यांना दीघायुष्य लाभो, अशा शुभेच्छाही एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड यांनी यावेळी व्यक्त केल्या.