मराठी विज्ञान परिषद पुणे विभाग आणि महाराष्ट्र ज्ञान महामंडळ यांच्या संयुक्त विद्यमाने ‘संदर्भ सूची (Bibilography)’ या विषयावर डॉ. पाटील यांचे व्याख्यान आयोजिले होते. मयूर कॉलनीतील इंडियन इन्स्टिट्यूट ऑफ एज्युकेशनच्या सभागृहात झालेल्या व्याख्यानावेळी प्रा. विनय र. र., राजेंद्र सराफ आदी उपस्थित होते. महाविद्यालय व विद्यापीठात अनेक विषयांवर संशोधन होत असते. अनेक तंत्रज्ञ, अभियंते, शास्त्रज्ञ प्रयोग करून नवीन निर्मिती करतात. त्यांनी केलेल्या संशोधनाच्या सादरीकरणात वेगवेगळ्या संदर्भांची मांडणी कशी करावी, याबद्दल डॉ. पाटील यांनी सांगितले. संशोधने, जर्नल, शोधनिबंध जागतिक पातळीवरील नियतकालिकात प्रसिद्ध करण्याविषयी माहिती दिली.
डॉ. योगेश पाटील म्हणाले, “विविध क्षेत्रातील लहानातील लहान गोष्टींचे संशोधन होणे आवश्यक आहे. संशोधनाची मांडणी करताना संशोधनाचे विश्लेषण, वापरलेल्या संदर्भांची माहिती, त्याचा परीणाम याविषयी लेखन व्हावे लागते. निरनिराळ्या विषयांवर तयार करण्यात येणाऱ्या जर्नलची मांडणी पारदर्शक पद्धतीने व्हावी. जर्नलसची सत्यता सध्याच्या विकसित तंत्रज्ञाच्या माध्यमातून पडताळली जाते. त्यामुळे इंटरनेटवरील माहिती कॉपी पेस्ट करू नये. पैसे देऊन जर्नलचे परीक्षण करणाऱ्या नियतकालिकांमध्ये आपले संशोधन प्रसिद्ध करू नये. त्यामुळे तुमच्या कामाचे योग्य मूल्यमापन होत नाही.”
उपाध्यक्ष प्रा. राजेंद्र सराफ यांनी कार्यक्रमाचे प्रास्ताविक केले. तर अध्यक्ष विनय र र यांनी आभार प्रदर्शन केले.