‘चांद्रयान-२ मोहीमे’वर मराठी विज्ञान परिषदेतर्फे व्याख्यान
पुणे : मराठी विज्ञान परिषद आणि इन्स्टिट्यूशन ऑफ इंजिनिअर्स यांच्या संयुक्त विद्यमाने ‘इस्रो चांद्रयान-२ मोहीम व अवकाश मोहीमेत युवकांना उपलब्ध संधी’ या विषयावर व्याख्यानाचे आयोजन केले आहे. येत्या मंगळवारी (दि. ६ ऑगस्ट) सायंकाळी ६.०० वाजता शिवाजीनगर येथील इन्स्टिट्यूशन ऑफ इंजिनिअर्सच्या सभागृहात हे व्याख्यान होणार असून, ते सर्वांसाठी विनामूल्य खुले राहणार आहे. भारतातील नासाच्या प्रतिनिधी अपूर्वा जाखडी आणि लीना बोकील या मार्गदर्शन करणार आहेत. अमेरिकेच्या सॅन डिएगो येथे नासामार्फत आयोजित अंतराळ संशोधन अभ्यासासाठी अपूर्वा आणि लीना यांना निवडले होते. अपूर्वा अवकाश शिक्षिका, तर लीना उद्योजिका आहेत.
इस्रोच्या ‘चांद्रयान-२’ चे २२ जुलैला यशस्वीपणे प्रक्षेपण करण्यात आले. चंद्राच्या दक्षिण ध्रुवावर ७ सप्टेंबर रोजी ‘विक्रम’ लँडेर अलगदपणे उतरणार आहे. त्यानंतर ‘प्रज्ञान’ नावाचा रोव्हर तेथील माहिती संकलन करून ती इस्रोला पाठवणार आहे. ही मोहीम कशा प्रकारे काम करते? आणि या मोहिमेचा उद्देश काय? तसेच अवकाश तंत्रज्ञानात युवकांना कोणत्या संधी आहेत, अशा विविध मुद्यांवर अपूर्वा आणि लीना बोलणार आहेत, अशी माहिती अध्यक्ष विनय र. र. यांनी दिली.