पुणे : शुक्ल यजुर्वेदिय माध्यंदिन महाराष्ट्रीय ब्राह्मण मध्यवर्ती मंडळाच्या याज्ञवल्क्य उद्योजक विकास अभियानाच्या (युवा) दहाव्या वर्धापन दिनानिमित्त चंद्रकांत जोशी यांच्या स्मरणार्थ दिला जाणारा ’युवा उद्योजक पुरस्कार’ श्रीपाद शंकर नगरकर सराफ पेढीचे वसंत नगरकर आणि सृजन आर्ट गॅलरी पुरस्कृत ’सृजन युवा पुरस्कार’ अभिनेते पद्मश्री मनोज जोशी यांना, तर ‘कै. दिगंबर सर्वोत्तम कर्जतकर पुरस्कार’ यंदा ज्येष्ठ कार्यकर्ते अनिल पाठक आणि ज्ञानेश्वर त्रैमासिकाचे माजी संपादक रामचंद्र कुलकर्णी यांना जाहीर झाला आहे, अशी माहिती संस्थेच्या मंजुषा वैद्य, श्रीकांत जोशी यांनी पत्रकार परिषदेत दिली. यावेळी अजय कुलकर्णी, जयंत कुलकर्णी आदी उपस्थित होते.
हा ‘युवा’ पुरस्कार वितरण सोहळा येत्या शनिवारी (दि. २० ऑक्टोबर २०१८) सायंकाळी ५.३० वाजता म्हात्रे पुलाजवळील शुभारंभ लॉन्स येथे होणार आहे. या सोहळ्यासाठी प्रमुख पाहुणे म्हणून महाराष्ट्र राज्य सहकारी परिषदेचे अध्यक्ष (राज्यमंत्री दर्जा) शेखर चरेगावकर व पितांबरी प्रॉडक्ट्सचे रवींद्र प्रभुदेसाई उपस्थित राहणार आहेत. याशिवाय प्रसिद्ध निवेदक आणि अभिनेते राहुल सोलापूरकर, बडवे इंजिनिअरिंगचे व्यवस्थापकीय संचालक श्रीकांत बडवे, सिटी कॉर्पोरेशनचे अनिरुद्ध देशपांडे, अभि ग्रुप ऑफ कंपनीजचे जितेंद्र जोशी, आमदार प्रा. मेधा कुलकर्णी, शुक्ल यजुर्वेदिय माध्यंदिन महाराष्ट्रीय ब्राह्मण मध्यवर्ती मंडळाचे उमाकांत जोशी, कार्याध्यक्ष विश्राम कुलकर्णी आदी मान्यवर उपस्थित राहणार आहेत.