आजवर ९८६ ‘सेरेब्रल पाल्सी’ ग्रस्तांना मुकुल माधव फाउंडेशनचा मदतीचा हात
पुणे : फिनोलेक्स इंडस्ट्रीज आणि मुकुल माधव फाउंडेशन यांच्या संयुक्त विद्यमाने ‘सेरेब्रल पाल्सी’ आजाराने त्रस्त मुलामुलींसाठी राबविण्यात येत असलेल्या अभियानांतर्गत २६६ रुग्णाची तपासणी करण्यात आली. ‘सेरेब्रल पाल्सी’ग्रस्तांसाठी दोन दिवसीय सर्वंकष मूल्यांकन आणि तपासणी शिबीर रत्नागिरी आणि सातारा येथे आयोजिले होते. रत्नागिरीमध्ये ७९ मुले आणि सातारामध्ये १८८ मुलांची तपासणी केली. आवश्यकतेनुसार शस्त्रक्रिया आणि ऑर्थोटीकसाठी सल्ला दिला. यासाठी पुण्यातील संचेती, केईम हॉस्पिटल, एच. व्ही. देसाई हॉस्पिटल आणि रत्नागिरी व सातारा येथील वैद्यकीय टीमचा समावेश होता. आजवर ९८६ मुलांवर उपचार केल्याचा आनंद आहे, अशी भावना फाउंडेशनच्या व्यवस्थापकीय विश्वस्त रितू प्रकाश छाब्रिया यांनी व्यक्त केली.
रत्नागिरी येथे जिल्हा परिषदेचे अधिकारी, जिल्हा वैद्यकीय अधिकारी डॉ. आठल्ये, अतिरिक्त जिल्हा वैद्यकीय अधिकारी डॉ. ठोमरे , सिव्हिल सर्जन डॉ. भोळंदे, जिल्हा परिषद एज्युकेशन डिपार्टमेंटचे गव्हाणे उपस्थित होते. सातारा जिल्हा परिषदेचे अधिकारी डॉ. कैलाश शिंदे, डिस्ट्रिक्ट हेअल्थ ऑफिसर डॉ. भगवान पवार यांच्या सहकार्याने पार पडला. गेल्या २० वर्षांपासून फिनोलेक्स इंडस्ट्रीज मुकुल माधव फौंडेशनच्या साथीने आरोग्य आणि शिक्षण क्षेत्रात उल्लेखनीय काम करत आहे. उपेक्षितांना आनंद आणि जगण्याचे बळ देण्याचे काम संस्थेकडून होत आहे. आजवर हजारो लोकांच्या चेहऱ्यावर हास्य फुलवण्याचे काम संस्थेने केले आहे. सेरेब्रल पाल्सी निर्मूलन अभियान मुकुल मांडव फौंडेशन २०१५ पासून राबवत आहे. सध्या राज्यातील रत्नागिरी (२) आणि सातारा (४) या दोन जिल्ह्यात सहा फिनोलेक्स पुनर्वसन केंद्र सुरु आहेत.
सातारा, वाई आणि पाचगणी या केंद्रांवर संचेती हॉस्पिटल, भारती हॉस्पिटलच्या सहकार्याने समुदेशन, फिजिओथेरपी आणि स्पीच थेरपीची सोय उपलब्ध करून देण्यात आलेली आहे. तर पाटण केंद्रावर कृष्णा हॉस्पिटल कराड यांच्या मदतीने आठवड्याला फिजिओथेरपीची सोय करण्यात आलेली आहे. अलीकडेच संस्थेने योग्य आहार आणि खाण्याच्या सवयी यासाठी आहारतज्ज्ञ जोडून घेतले आहे. या केंद्रांवर २०-२५ मुले नियमित फिजिओथेरपी घेत आहेत. आजवर ४९ शस्त्रक्रियाही करण्यात आल्या आहेत. झडगांव, रत्नागिरी येथील केंद्रावर डेरवन येथील वालावलकर हॉस्पिटलमधील फिजीओथेरपीस्ट आणि स्पीच थेरपिस्टची नियुक्त केले आहेत.
आशा आणि एएनएम परिचारिकांना प्रशिक्षित करण्यासाठी पुण्यातील सिम्बायोसिस कॉलेज ऑफ नर्सिंगची मदत झाली. साताऱ्यातील २० जिल्हा रुग्णालयात कार्यरत ८६२ परिचारिकांना प्रशिक्षण दिले गेले आहे. नुकतेच रत्नागिरीतील ६० आशा आणि एएनएम परिचारिकांना डॉ. सलोनी राजे यांनी प्रशिक्षण दिले आहे. सातारा आणि रत्नागिरी येथील अधिकाऱ्यांनी फाऊंडेशनला मोलाचे सहकार्य केले.
काय आहे सेरेब्रल पाल्सी?
सेरेब्रल पाल्सी मेंदूतील काही भागांना हानी पोचल्याने उद्भवतो. त्यामुळे हालचाली, मानसिक तोल आणि इतर अवयव मंदावतात. लहानपणी हा आजार होतो आणि व्यक्तिपरत्वे त्यात बदल होतात. जगात त्याचे प्रमाण १००० मागे २, तर भारतात १००० मागे ३ असे आहे. परंतु, या आजाराने ग्रस्त मुलांची ज्ञानक्षमता सर्वसाधारण असते. त्यामुळे त्यांना शिक्षणाच्या मुख्य प्रवाहात सामावून घेतले पाहिजे, असा सल्ला तज्ज्ञांनी दिला आहे.