पुणे : ‘फेडरेशन ऑफ इंडियन चेंबर ऑफ कॉमर्स अँड इंडस्ट्री’ची (फिक्की) महिला शाखा असलेल्या ‘फिक्की लेडीज ऑर्गनायझेशन’ अर्थात ‘फ्लो’ या संस्थेच्या पुणे विभागाच्या अध्यक्षपदी प्रसिद्ध उद्योजिका आणि मुकुल माधव फाउंडेशनच्या व्यवस्थापकीय विश्वस्त रितू प्रकाश छाब्रिया यांची निवड करण्यात आली आहे. नुकत्याच पार पडलेल्या ‘फ्लो’च्या बैठकीत हा निर्णय जाहीर करण्यात आला. संस्थेच्या मावळत्या अध्यक्षा संगीता ललवाणी यांच्याकडून रितू प्रकाश छाब्रिया यांनी या पदाची सूत्रे स्वीकारली. ही निवड २०१९-२० या कालावधीसाठी असणार आहे.
रितू प्रकाश छाब्रिया मुकुल माधव फाउंडेशनच्या माध्यमातून अनेक सामाजिक उपक्रम राबवित आहेत. ससून सर्वोपचार रुग्णालयाचे अत्याधुनिकरण करण्यामध्ये त्यांचे मोलाचे योगदान राहिले आहे. नवजात शिशु अतिदक्षता विभाग, एन्डोस्कोपी विभागाचा चेहरामोहरा त्यांनी बदलला आहे. फिनोलेक्स इंडस्ट्रीजचे सीएसआर भागीदार असलेल्या मुकुल माधव फाउंडेशनच्या माध्यमातून रितू प्रकाश छाब्रिया आरोग्य, शिक्षण, सामाजिक विकास, स्वच्छता आणि जलसंवर्धन या क्षेत्रात भरीव काम करीत आहेत. अनेक प्रकल्पांचे सुयोग्य नियोजन व अंमलबजावणीचे काम त्या गेल्या २१ वर्षांपासून सातत्याने करीत आहेत.
समाजातील वंचितांचा सर्वांगीन विकास, शेती, आरोग्य आणि शिक्षण सुधारण्यासाठी ‘शहरातून गावाकडे’ या उद्दिष्टावर काम करणार असल्याचे रितू प्रकाश छाब्रिया यांनी कार्यभार स्वीकारल्यानंतर सांगितले. शहरातील महिलांच्या साथीने ग्रामीण भागातील महिलांना सक्षम करणार असल्याचे त्या म्हणाल्या. गेल्या वर्षभरात महिलांना आर्थिकदृष्ट्या सक्षम बनवून स्वतःच्या पायावर उभे राहण्यासाठी प्रोत्साहन देण्यासह ‘फ्लो’चे सदस्यत्व वाढविण्यात यश आल्याचे मावळत्या अध्यक्षा संगीता ललवाणी यांनी सांगितले.
उद्योग आणि व्यवसायासाठी प्रोत्साहन देऊन महिलांचे सबलीकरण, आर्थिक सक्षमीकरण करण्याच्या उद्देशाने ‘फ्लो’ या संस्थेची १९८३ साली स्थापना करण्यात आली. या संस्थेत सहा हजारांपेक्षा अधिक महिला उद्योजक, व्यावसायिक आणि कॉर्पोरेट एक्झिक्यूटिव्हजचा समावेश आहे. पुणे विभागात सध्या ४०० पेक्षा अधिक महिला सदस्य आहेत. या संस्थेचे देशभरात एकूण १५ विभाग आहेत. महिलांमध्ये उद्यमशीलता आणि व्यावसायिक कौशल्ये विकसित व्हावीत, यासाठी ‘फ्लो’तर्फे विविध कार्यशाळा, चर्चासत्रे, परिषदा, व्याख्याने, प्रशिक्षण आदी कार्यक्रमांचे आयोजन केले जाते.