पुणे- पुण्याच्या पोलीस आयुक्तालयात आरोपी पकडण्यासाठी ‘प्लॅनचेट’ चे उद्योग झालेत .पण पुणेकर ते उद्योग करणाऱ्यांना पुरून उरले … याच पुण्यात सातत्याने जो नवा कमिशनर येईल ..त्याच्या हळू हळू अंगात … हेल्मेट चं भूत संचारतं, आजपर्यंत प्रत्येक कमिशनराच्या डोक्यावर बसलेलं हे भूत उतरवायचं काम पुणेकरांनी विविध मार्गे केलं ..आणि त्यात यश हि मिळवीलं , हे अगदी खरं असलं तरी ,या पोलीस आयुक्तालयात दडून बसलेलं हे भूत अजूनही तिथेच वास्तव्य जणू करून असावं,याची प्रचीती वारंवार येते आहे . होय तसं दिसतंय खरं… कारण आता पुण्यात अलीकडे नव्यानेच आलेल्या व्यंकटेशम नावाच्या सुप्रसिद्ध कमिशनरांच्या डोक्यावरही हे कुप्रसिद्ध भूत बसल्याने …1 जानेवारी पासून पुण्यात हेल्मेट सक्ती राबविली जाणार आहे असा म्हणे फतवा निघाला आहे … भाजप सरकारच्या मागे जणू सारी नौकरशाही हात धुऊनच मागे लागली असावी अशा निर्णयातील हा एक निर्णय म्हटल्यास वावगं वाटू नये . धरणात पाणी असताना ,पाणी कपातीचा बडगा उगारणारं पाटबंधारे खाते, १०० नगरसेवकांचे बळ लाभूनही भाजपच्याच विकासकामांची जंत्री विनाकारण अडकवून ठेवणारं, पे आणि पार्क चं भूत कायम उराशी बाळगणारं पालिका प्रशासन ..या सर्वांनी आगामी निवडणुकीच्या तोंडावर जणू जनतेला छळून भाजपला पराभूत करण्याचा विडाच उचललेला दिसतोय ..ज्या कारणांनी राष्ट्रवादी आणि कॉंग्रेसचं सरकार पराभूत झालं तीच कारणं या ही सरकारचा सत्यानाश करणार काय ? असा प्रश्न आता निर्माण होऊ पाहतो आहे
पोलीस आयुक्तांनी 1 जानेवारीपासून हेल्मेटसक्तीचा निर्णय घेतला आहे. पोलीस आयुक्तांनी नवीन वर्षाच्या सुरुवातीपासून त्याची अंमलबजावणी करण्याचा निर्णय घेतला आहे. शहरातील वाढत्या अपघातांमुळे आणि न्यायालयाच्या आदेशाची अंमलबजावणीचे कारण अर्थात त्यासाठी देण्यात येत आहे .मोटारींना काळ्या काचा लावल्या तर ; म्हणे आत बसलेल्या ‘चोरांचे’चेहरे दिसत नाहीत आणि मोटारसायकलवरून मंगळसूत्रे खेचणाऱ्या चोरांच्या मात्र ओळखी हेल्मेटवरूनच लक्षात येतील असे कदाचित पुन्हा पुन्हा का पोलिसांना वाटते हे न समजणारे कोडे आहे .शिवाय ना इतिहास पाहतात ,ना भूगोल … अशावेळी त्यांना न्यायालयाच्या निर्णयाची मोठी चिंता असते . शहरातील होर्डींग्ज कोसळून चार निष्पाप जीव हकनाक गेले … त्या होर्डींग्ज बाबत पोलिसांनीच काय कोणीही अजूनही काहीही कारवाई केली नाही. पण कधी काळी कोणी करोडोच्या मोटारीने फिरणाऱ्या एका शैक्षणिक आणि सामाजिक क्षेत्रातील महान स्त्रीने न्यायालयाकडून हा निर्णय मिळविला .आणि वारंवार जनतेतून विरोध होऊनदेखील वर्षानुवर्षे सातत्याने तो राबविण्याचा ‘विक्रम’ हट्ट पोलीस सोडेनात असे चिन्ह आहे .
याआधीही अनेकदा पुण्यात हेल्मेटसक्ती करण्यात आली होती. मात्र नागरिकांच्या विरोधामुळे त्याची अंमलबजावणी होऊ शकली नव्हती. मात्र पोलीस आयुक्तांनी नव्याने हा निर्णय घेतला आहे. यामुळे पुण्यात पुन्हा एकदा नागरिक रस्त्यावर उतरण्याची शक्यता आहे.
याआधीही पुण्यात हेल्मेटसक्ती कऱण्याचा प्रयत्न करण्यात आला होता. मात्र प्रशासनाला नागरिकांच्या संतापाला सामोरं जावं लागलं होतं. ठिकठिकाणी सर्वसामान्य नागरिकांनी रस्त्यांवर उतरुन निर्णयाचा निषेध केला होता. विशेष म्हणजे काही राजकीय पक्षांनीही त्यांना पाठिंबा दिला होता. हेल्मेटमुळे मानदुखी जडते, आजूबाजूचे दिसण्यात अचडण येते असा आक्षेप घेत आधी सार्वजनिक वाहतूक सुधारा, वाहतूक नियोजन तसंच रस्त्यांची स्थिती सुधारा अशा मागण्या करण्यात आल्या होत्या.