मराठी मनोरंजनसृष्टीला लाभलेला अष्टपैलू व हरहुन्नरी अभिनेता म्हणजे भरत जाधव. आजवर अनेक चित्रपट व नाटकांमधून त्यांनी साकारलेल्या विविध भूमिकांनी प्रेक्षकांची मने जिंकली आहेत. भरत जाधव यांनी विनोदी चित्रपटासोबत कौटुंबिक, ग्रामीण, सामाजिक आशयाच्या चित्रपटांमध्ये लक्षवेधी काम केलंय. मराठी सिनेसृष्टीतील भरत जाधव यांच्या महत्वपूर्ण योगदानाविषयी या महिन्याचे मानकरी म्हणून ‘फक्त मराठी’ने त्यांची निवड केली आहे. भरत यांना मानाचा मुजरा करीत ‘फक्त मराठी’ने भरत जाधव विशेष चित्रपटांचा नजराणा २५ मार्च ते ३१ मार्च दरम्यान दररोज सायंकाळी ७:३० वा. आपल्या प्रेक्षकांसाठी आणला आहे.
या चित्रपटांमध्ये ‘चल गजा करू मजा’, ‘सालीनं केला घोटाळा’, ‘मुक्काम पोस्ट लंडन’, ‘गोंद्या मारतंय तंगड’, ‘काळशेकर आहेत का?’, ‘होऊन जाऊ दे’, ‘लग्नाची वरात लंडनच्या घरात’ या चित्रपटांचा आस्वाद ‘फक्त मराठी’च्या प्रेक्षकांना घेता येणार आहे.